Dili Loron 13, fulan-Fevereiru, tinan 2026, Sekretáriu Estadu ba Formasaun Profisionál no Empregu, Sua Exelénsia Rogério Araújo Mendonça L.Ed, hala’o sorumutu importante ho reprezentante labarik feto no feto foin-sa’e husi munisípiu 13 inklui RAEOA, hodi rona labarik sira-nia aspirasaun ba Plataforma Diretu labarik feto no foin-sa’e feto sira iha Timor-Leste.

Iha sorumutu ne’e, labarik feto no foin-sa’e feto husi munisipiu 12 inklui RAEOA ne’ebé mak akompañia husi Instituto ba defeza no diretu ba labarik (INDDICA) no Movimentu Feto Foin-sa’e Timor-Leste (MOFFE), hodi ko’alia kona-ba situasaun ne’ebé labarik feto sira hasoru iha sosiedade ho pontu importamnte sira hanesan tuir mai ne’e;

• Barak mak la eskola hanesan labarik mane.

• Problema kuidadu saúde tanba menus koñesimentu kona-ba saúde reprodutiva no seksuál.

• Violénsia no abuzu oi-oin.

• Eksplorasaun ba servisu obrigatóriu.

• Falta oportunidade asesu ba informasaun no espresa hanoin.

• Moris la ho hakmatek no seguru.

• Media online la seguru ba labarik feto.

• Prátika kultura ne’ebé limita moris feto.

• Diskriminasaun no tratamentu la justu.

Aleinde ne’e, Sekretáriu Estadu kontente tanba labarik feto no foin-sa’e feto sira la tauk no prontu luta ba direitu no liberdade.

“Parte instituisaun ne’ebé ko’alia kona-ba Formasaun Profisional no Empregu, kontinua luta ba direitu infantil, tuir konvensaun internasionál ILO 182 no 138 ne’ebé fó proteksaun ba labarik,” tenik Sekretariu Estadu.

Enkontru ida ne’e fó sinal klaru katak labarik feto no foin-sa’e feto sira iha Timor-Leste prontu foti voz, defende direitu, no luta ba liberdade, ho esperansa katak governu no instituisaun relevante sei kontinua serbisu hamutuk hodi garante proteksaun no oportunidade igual ba sira.