Dili, 12 Fevereiru 2026

Vizita Kortezia husi Embaixadór Japaun mai Timor-Leste Yamamoto Yasushi bá Ministru Transporte no Komunikasaun kontinua Hametin Koperasaun Bilaterál.

Embaixadór Yamamoto Yasushi, Embaixadór Estraordináriu no Plenipotensiáriu Japaun nian bá Repúblika Demokrátika Timor-Leste, ne’ebé simu pose iha loron 9 Janeiru 2026, hala’o vizita kortezia bá Ministru Transporte no Komunikasaun, Eng.Miguel Marques Gonçalves Manetelu. Embaixador ne’e hetan akompañamentu husi Sra.Tateno Minako, Terseiru Sekretáriu Embaixada Japaun nian.

Ministru Manetelu simu ho ksolok no hato’o parabéns bá Embaixadór Yamamoto bá nia nomeasaun. Sorumutu ne’e hala’o iha atmosfera kordiál no konstrutivu, reflete relasaun forte no kleur entre Timor-Leste nomos Japaun.

Diskusaun sira foka bá kooperasaun bilaterál ne'ebé la'o hela iha setór transporte nian, inklui kontinuasaun husi projetu sira ne'ebé hahú iha embaixadór Japaun sira uluk nia okos. Atualiza mós kona-bá dezenvolvimentu Portu Mahata iha Oecussi no Portu Kairabela iha Vemasse, Baucau nomos kona-bá investimentu privadu husi Tsuneishi – Timor Shipbuilding Company iha Laleia, Manatuto.

Ministru reafirma ninia apoiu tomak hodi fasilita investimentu sira ne’ebé la’o daudaun no iha futuru, hodi subliña sira-nia importánsia la’ós de’it bá dezenvolvimentu ekonómiku maibé mós bá esforsu konstrusaun Estadu nasionál. Hafoin Timor-Leste nia adezaun nu’udar membru plenu foun liu bá ASEAN iha 26 Outubru 2025, Ministru hato’o kompromisu nasaun ne’e nian atu hametin kolaborasaun ho Japaun, nu’udar parseiru prinsipál ida bá dezenvolvimentu ASEAN nian, partikularmente iha área dijitalizasaun, siberseguransa no komunikasaun.

Embaixadór Yamamoto espresa nia apresiasaun bá Ministru nia ne’ebé simu ho ksolok no hato'o Japaun nia kompromisu bá kolaborasaun besik hodi asegura kompletasaun oportunu bá projetu sira ne'ebé hala'o daudaun, liuliu Aeroportu Internasionál Prezidente Nicolau Lobato nia mós hato’o konvite bá Ministru atu vizita Embaixada Japaun iha Dili.

Ministru konklui hodi hato’o ninia agradesimentu bá apoiu kontinuadu husi Governu Japaun bá Timor-Leste iha setór transporte tomak no área dezenvolvimentu nasionál sira seluk.

https://sdi.gov.tl/ministerio/presrealease/create 

Média MTK