𝗔𝗶𝗻𝗮𝗿𝗼, 𝟭𝟰 𝗙𝗲𝘃𝗲𝗿𝗲𝗶𝗿𝘂 𝟮𝟬𝟮𝟰

IX Governu Konstitusionál ne’ebé lidera husi Primeiru Ministru (PM), Kay Rala Xanana Gusmão, lansa ofisiálmente projetu rehabilitasaun Estrada Urbana Ainaro Vila, serimónia lansamentu no asinatura ne’e hala’o iha Edefísiu PAM Ainaro Vila, iha loron sabadu-ne’e.

Iha nia diskursu Primeiru-Ministru (PM), Kay Rala Xanana Gusmão, hateten, inan, aman, ferik, katuas ho kiik oan sira ne’ebé mai asisti seremónia lansamentu no asina kontratu bá projetu rehabilitasaun estrada urbana Ainaro, projetu ne'e reprezenta pasu foun bá modernizasaun infraestrutura bazika iha Munisípiu Ainaro.

“Ohin ita boot sira testamunña bá kompañia rua ne’ebé asina ona kontratu, hodi konstrui estrada iha ainaro laran, ohin PAM Ainaro temi katak buat barak seida’uk halo, ita bele dehan tarde duni ona maibe ita sei halo, ha’u hare, ha’u nia alin, bin, ferik ho katuas sira aguenta tinan 24, barak mate ruin ita buka la hetan terus tinan 24 nia laran, tinan ida ne’e iha fulan Maiu ita sei restaura ita nia ukun bá dala 24, halo di’ak ka halo ladun diak, iha tinan 24 saida mak sei falta ita sei halo kompletu. Obra ohin lansa laos Ministériu ida nian, obra ne’e imi nian,” hateten PM Xanana iha nia diskursu.

Iha biban ne’e PM Xanana hato'o bá komunidade katak: "Imi hein kleur duni". Infraestrutura bázika hanesan estrada no ponte mak xave bá povu hodi sente dezenvolvimentu iha setór hotu-hotu.

Iha fatin hanesan, Ministru Obras Públikas, Samuel Marçal, Ainaro potensiál bá turismo, tanba ne’e Ministru hato'o agradesimentu bá populasaun afetadu sira ne'ebé prontu kolabora, inklui oferese sira-nia kintál no ai-horis hodi fasilita konstrusaun estrada urbana Ainaro Vila.

“Se hakarak dezenvolvimentu ne’e lao ita tenke koopera bá joven sira hakarak servisu ko’alia kompañia ne’ebé kosntrui Estrada, labele tuda no estraga ekipamentu kompañia nian, osan ne’ebé uja hodi konstrui Estrada ne’e, osan povu nian, tanba ne’e mak ohin ita mai asina kontratu iha fatin ne’e,” dehan Ministru Obras Públikas.

Ministru Obras Públikas mós apela bá joven sira atu labele halo impedimentu no husu bá joven sira atu kontribui prosesu konstrusaun Estrada ne’e.

Prezidente Autoridade Munisípiu (PAM) Ainaro, Sra.Manuela Georgina Carmo Bucar Corte-Real, hato'o agradesimentu kle'an bá Primeiru-Ministru Kay Rala Xanana Gusmão durante serimónia lansamentu projetu rehabilitasaun estrada urbana iha sidade Ainaro.

Iha ninia diskursu, PAM Ainaro hato’o sentimentu haksolok hodi hateten, esperansa bá dezenvolvimentu sei la lakon, Prezensa Primeiru-Ministru nian hatudu kometimentu governu nian hodi rona povu Ainaro nia "halerik" kona-bá kondisaun estrada ne'ebé ladi'ak durante tinan barak.

“Fiar katak estrada foun ne'e sei fasilita movimentu transporte, aumenta seguransa bá komunidade no hamoris fali ekonomia lokál iha munisípiu laran,”tenik PAM Ainaro.

PAM Ainaro apela bá komunidade sira, atu tau matan bá projetu rehabilitasaun Estrada.

Entretantu rehabilitasaun Estrada Urbana Pakote I Projetu rehabilitasaun estrada Ainaro Vila, Munisípiu Ainaro Package I.I-6.058.02 km sei konstrui husi kompañia Fortuna Start Unipessoal, lda, numeru kontratu SSS/009/MOP-2026, valor kontratu $4.324.875.82 durasaun kontratu fulan 6 no projeitu ne'e sei fiskaliza husi ekipa tékniku Ministériu Obras Públikas no rehabilitasaun Estrada Urbana Ainaro Vila Pakote II.I-6193.25 km, sei konstrui husi kompañia, Riqueza Gavinto Unipessoal, Lda ho numeru kontratu SSS/010/MOP-2026, valor kontratu $ 4,324.875,82 durasaun kontratu fulan 6 nafatin hetan fiskalizasaun husi Ministériu Obras Públikas.

Serimónia lansamentu no asina kontratu projetu rehabiklitasaun Estrada urbana Ainaro Vila, ne'e partisipa mós husi membru Governu, autoridade lokál. Komunidade sira ne'ebé partisipa iha seremónia lansamentu ne’e senti orgullu tanba Ainaro mós simu ona atensaun bá infraestrutura urbana hanesan mós munisípiu sira seluk.

https://sdi.gov.tl/ministerio/presrealease/create 

𝗠𝗶́𝗱𝗶𝗮-𝗠𝗢𝗣