Ainaro, 14 Fevereiru 2026 — Povu iha Munisípiu Ainaro hatudu sira-nia orgullu no esperansa boot bainhira governu ne’ebé lidera hosi Primeiru Ministru Kay Rala Xanana Gusmão ofisialmente selebra kontratu ba projetu rehabilitasaun estrada urbana nomos hala'o lansamentu fatuk dahuluk ba konstrusaun estrada iha Kampu Autoridade Munisipiu Ainaro.

Serimónia lansamentu ne’e konsidera nu’udar momentu importante ida ba dezenvolvimentu infraestrutura lokal. Iha eventu ne’e, Sekretáriu Estadu Terras no Propriedades, Jaime Xavier Lopes, M.Eng. partisipa mos hanesan Ainaro oan ida ne'ebé hatudu nia apoiu direta ba inisiativa ne’ebé sei lori benefísiu boot ba komunidade.

Projetu rehabilitasaun estrada ne’e fahe ba pakote rua. Pakote ida ho naruk 6,058.02 km ne'ebé kaer hosi kompaña Fortuna Star Unipessoal, Lda., ho númeru kontratu SSS/009/MOP-2026, no valor kontratu USD 4,324,875.82 ne'ebé nia durasaun implementasaun fulan 6. Pakote ida seluk ho naruk 6,193.25km ne'ebé kaer hosi kompaña Riqueza Gavinto Unipessoal, Lda., ho númeru kontratu SSS/010/MOP-2026 ho nia valor montante orsamentu hanesan, no durasaun kontratu fulan-6.

Prezidente Autoridade Munisipal Ainaro, Sra. Manuela Georgina Carmo Bucar Corte-Real, hato’o liafuan benvindu ba Primeiru Ministru no delegasaun governu, nomós fó votus agradese ba apoiu governu nian ne’ebé fo ona prioridade ba estrada urbana Ainaro-Villa nu’udar infraestrutura estratéjiku ba mobilidade, ekonomia lokal no servisu públiku.

Nia mos refere katak lansamentu ne’e akontese iha loron Valentine Day, sai nuudar simbolu domin ida ba povu Ainaro tanba ne'e nia reprezenta povu Ainaro hato’o agradesimentu ne'ebé nakonu ho domin ba governu no espesialmente ba Xefe Governu, Kay Rala Xanana Gusmão ne’ebé kontinua fó atensaun ba dezenvolvimentu iha área rural sira.

Iha serimonia ne'e, Ministru Obras Públikas, Samuel Marçal, husu komunidade, autoridade lokal no parte interesada sira atu koopera ho governu no kompaña sira, hodi garante projetu ne’e lao ho di’ak, seguru no remata tuir prazu.

Nia esplika, rehabilitasun estrada urbana ne'e presiza espasu luan tanba ninia utilidade ne'e la’ós de’it ba transportasaun kareta, motor de'it, maibé mós garante ninia funsionamentu ba movimentasaun ema hotu-hotu, hahú hosi kareta, motor to'o ba ema ne'ebé la'o ain, no parte seluk fo mós espasu ba prosesu instalasaun drenajen, bee-mós, eletrisidade.

Fatin hanesan, Primeiru Ministru Kay Rala Xanana Gusmão espresa ninia sentimentu kontente boot ba prezensa inan-aman no ferik katuas sira hotu, tanba ho prezensa ida-ne'e sai nuudar testamuña ba serimónia refere.

"Ohin ita bo'ot sira hotu sai testamuña ba assinatura kontratu ho kompanha rua, atu haree ba estrada urbana ih Ainaro-Villa laran. Hau kontente haree apa ho ama sira, ha'u nia maun ka alin katuas sira, ha'u kontente haree bin ferik sira, ne'ebe augenta funu tinan 24 ne'ebé ohin loron sei moris, ne'e duni husu ba hotu hotu ne'ebe hetan servisu iha estadu, atu kaer metin sira-nia mehi, mehi atu dezenvolve ita nia rai,"katak nia. Media SETP

Fontes: https://www.facebook.com/share/p/1CXbofmWM4/