Asuntu : VIZITA OFISIAL PM KAY RALA XANANA GUSMÃ IHA SINGAPURA Singapura, 13 Jullu 2025-Primeiru-Ministru (PM), Kay Rala Xanana Gusmão hala’o vizita ofisiál bá Singapura hodi atende konvite husi Primeiru-Ministru Repúblika Singapura, Lawrence Wong, ne’ebe hahu hosi 13 to’o 16 jullu 2025. Iha loron Domingu 13 Jullu PM kay Rala Xanana Gusmão ho delegasaun arangka husi Dili, Timor-leste ho aviaun Aero Dili iha tuku 8 : 30 dader oras Timor leste no too iha Aeroportu Internasionál Changi, Singapura iha tuku 10:53 oras Singapura nian. Wainhira Primeiru-Ministru ho nia Delegasaun too iha Singapura simu husi Ministru Relasaun Exteriór Singapura nian, Vivian Balakrishnan ho Embaixadór Timor-Leste (TL) bá Singapura, Alexandre Tilman. Husi Aeroportu Internasionál Changi, Xefe Governu Kay Rala Xanana Gusmao ho delegasaun diretamente bá fatin deskansa nian iha The Fullerton Hotel. Vizita ofisiál ne’e marka tinan 23 relasaun diplomátika entre nasaun rua nian. Vizita ida-ne’e sai nu’udár vizita ofisiál bá da-huluk hosi Primeiru-Ministru Kay Rala Xanana Gusmão nian bá Estadu-membru ASEAN ida dezde alkansa akordu unânime iha Simeira Xefe Estadu no Xefe Governu sira ASEAN nian bá dala-46, iha Kuala Lumpur, fulan maiu, kona-bá adezaun Timor-Leste nian iha organizmu rejionál ida-ne’e, ne’ebé ajendadu bá fulan outubru 2025. Vizita ofisiál ida-ne’e mós sei fortalese relasaun bilaterál no reforsa kooperasaun entre Singapura ho Timor-Leste. Inísiu vizita ofisiál ne’e sei hahú iha segunda 14 jullu ho Serimónia Boas-Vindas iha Ministériu Relasaun Esteriór, tuir kedan sei hala’o enkontru bilaterál ho Primeiru-Ministru Singapura, Lawrence Wong. Delegasaun ne’ebé akompaña Primeiru-Ministru kay Rala Xanana Gusmão maka membru seniór sira iha Gabinete, inklui Vise-Primeiru-Ministru, Ministru Koordenadór Assuntus Ekonómikus no Ministru Turizmu no Ambiente, Francisco Kalbuadi Lay; Ministru Negósiu Estranjeiru no Kooperasaun, Bendito dos Santos Freitas; Vise-Ministra bá Assuntu ASEAN, Milena Maria da Costa Rangel; no Sekretáriu Estadu Komunikasaun Sosiál, Expedito Dias Ximenes no Xefe Gabinete Primeiru-Ministru nian, Elizabeth Exposto. #Média SEKOMS
Data Publica : 28 Jul 2025
Descrisaun :
