Ermera 16/02/2026 Ministerio Agrikultura Pekuaria Peska no Floresta (MAPPF) liu husi Programa CALIP ho Diretor Ezekutivu ADB vizita ba Kafekultor sira nia to'os hodi hare direta atividade sira ne'ebe mak durante ne'e Kafekultor sira halo.

Iha Diskursu Diretor Ezekutivu ADB SHIEG esplika, primeira ves vizita ba plantasaun kafe iha Ermera Tokoluli no sente kontente tebes tanba hare Kafekultor sira nia servisu iha tereinu, no apoiu ne'ebe mak husi Projetu CALIP no ADB ne'e atu fo kbiit ba kafekultor sira hodi bele hadia sira nia moris no bele sustenta necesidade familia.

Projetu la sucesu se uainhira la iha kafekultor sira nia partisipasaun maximu iha to'os laran no esforsu tomak husi kafekultor sira hodi dezenvolve seitor agrikultura liu-liu hare ba produsaun kafe iha Timor Leste. Dehan Director Ezekutivu ADB.

Iha entrevista Diretor Jeral Agrikultura Kafe Plantas Industri Martino Laurentinho Soares esplika katak, vizita husi Director Ezekutivu ADB ne'e atu hare direta atividade ne'ebe mak durante ne'e agrikultor sira halo, tanba Orsamentu ne'ebe mak apoiu ba kafekultor ne'e mai husi Banco ADB ne'ebe husi Nasaun Japaun.

Orsamentu ne'ebe mak apoiu ba CALIP mai husi Nasaun Japaun no ADB mak halo jestaun hodi foka liu ba plantasaun kafe, tanba ita hatene katak kafe ne'e produtu ne'ebe uniku hodi halo exportasaun ba rai liur, maibe to'o agora ita hare Nia kualidade no kuantidade kafe menus ba bebeik maibe MAPPF mos tau atensaun hodi halo rehabilatsaun ba kafe iha Munisipiu Ermera, Aileu, Ainaro, Manufahi, Liquica, Manatuto no ba oin ita fiar katak ho apoiu ne'ebe mak husi Governo Japaun fo ba iha CALIP ne'e ita bele halo jestaun ho diak atu nune'e bele hasae produsaun kafe hodi bele fo benefisiu ba agrikultor sira. Tenik DJ Agrikultura

Nune'e mos Xefe Grupu Haburas Agrikultura Viriatu da Cruz Soares hateten, MAPPF mak foti dadus iha tinan 2022 no kontinua kedas ba iha treinamentu oinsa mak poda kafe ka tesi kafe no sira kontinua implementa kedas iha sira nia to'os hodi halo rehabilatsaun ba kafe no halo teraseri iha area rai lolon sira atu nune'e udan boot bee la bele lori fali rai metan ba mota, Projetu CALIP ne'ebe mak suporta husi MAPPF no ADB no to'os ne'ebe sira halo ho luan 20×20 no atividade sira ne'ebe mak sira halo mak poda ka tesi kafe no mos bele kuda aifuan hanesan has, abokate, rambutan, mangis, sabraka, derok, aidila no mos aifuan seluk tan.

Rekomendasaun ba MAPPF mak atu tau nafatin ba Orsamentu ba iha seitor Agrikultura, tanba kafe mak sai hanesan produtu ne'ebe mak uniku hodi halo exportasaun ba rai liur, no kafekultor sira mos presiza tebes ekipamentu hanesan, makina dulas kafe atu nune'e agrikultor sira halo procezamentu ba kafe ho kualidade ne'ebe mak diak, no mos makina sensor atu bele halo rehabilatsaun ba kafe rokusta.

Iha atividade vizita ne'e hetan patisipasaun husi Director Ezekutivu ADB ho nia ekipa, Diretor Jeral Agrikultura Kafe Plantas Industria, Project Mananeger CALIP, Xefe Aldeia Tokoluli no Agrikultor sira, no mos kontinua halo vizita ba iha Armazen Kafe Timor Global iha Railaku Munisipiu Ermera. Ekipa DMEA