Bobonaro,(17/2/2026), Ministru Agrikultura Pekuária Peska no Floresta Marcos “MAMETA” da Cruz akompaña husi Prezidenti Autoridade Municipal Bobonaro, Paul Moniz Maya, lansa kultivasaun kuda hare variedade Inpare 32 uza makina agrikola modernu ho objetivu katak agrikultór sira hahú moderniza Sistema Agrikultura tradisional ba Sistema agrikultura modernu iha suku Lahomea Postu Administrativu Maliana.

Ministru MAPPF esplika, atu reforsa setór inportante hanesan, setór agrikultura,Pekuária, Peska no Floresta hodi dezenvolve setór hirak ne’e iha relasaun ba malu ne’eduni husu ba agrikultór sira atu servisu hamutuk hodi aumenta ka hasa’e produsaun nune’e bele garantia ai-han hodi sustenta ba pupolasaun Timor laran tomak ho ai-han kuantidade barak ho kualiade diak.

Ministru Hatutan, durante ne’e Timor-leste sei inporta hahan husi rai liur hanesan, fos, na’an no ikan ne’e hanesan dezafiu ida ba Timor -oan sira maib’e sai mós oportunidade tanba liu husi dezafiu ne’e bele hetan benifisiu husi servisu hirak ne’ebé mak ita-halo.”ohin loron Ministériu mai iha ne’e atu haree saída mak bele halo hamutuk ho agrikultór sira iha baze tanba agrikutór sira mak autór ba dezenvolvimentu iha setór agrikultura, autór ne’e katak ema ne’ebé mak tama ih natar-laran, ke’e rai, kultiva rai, nomos hamo’os du’ut no kuidade hare to ikus bele kolleta “ Tenik Ministru

Ministériu agrikultura sira hahú neneik muda agrkultura subsistensia ba agrikultura modernua katak durante ne’e agrikultór sira kuda hare uza ekipamentu tradsionla maib’e agora bele uza ona makina kuda hare modernu hodi reduz tempu no kustu iha tempu kuda hare nian.

Iha fatin hanesan, Prezidenti Autoridade Municipal (PAM) Bobonaro ,Paul Moniz Maya hato’o agradese ba governu liu husi Ministériu Agrikultura Pekária Peska no Floresta tanba entrega ekipamentu modernu hanesan tratór boot, tratór ki’ik no makina kuda hare nian ho objetivu fasilita agrikultór sira hodi kuda hare la gasta tempu no ema barak iha tempu kuda hare nian katak uza makina kuda hare loron ida ka rua bele kuda ekrate ida ka rua tanba ne’e mak husu ba agrikultór sira katak Bobonaro tenki han fos rai rasik husi Maliana labele inporta husi fatin seluk. “ ha’u orgullu tebes inan-aman sira iha Maliana katak servisu nafatin iha ita-nia to’os ho natar maibé se ita vontande laiha maske natar bele luan ho rai bele luan maibé ita sei la hasa’e produsaun tanba fila fali ba ema nia vontande atu servisu” dehan PAM.

Iha atividade lansamentu kultivasaun hare variedade Inpare 32 ne’e aumesmu tempu MAPPF mós entrega ekipamentu agrikola hanesan Tratór boot unidade 2, tratór liman unidade 10 no makina kuda hare inklui atraladu 1 ba PAM Bobonaro. Ekipa DMEA