𝐃Í𝐋𝐈, 𝟐𝟎 𝐅𝐄𝐕𝐄𝐑𝐄𝐈𝐑𝐔 𝟐𝟎𝟐𝟔 – Sekretáriu Estadu Peskas, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, sesta ne’e abertura enkontru komité koordenasaun konjunta ho Embaixadór Japaun iha Timor-Leste, Sr. YAMAMOTO Yasushi, no Reprezentante Ajénsia JICA.

Soru-mutuk ne’e ho objetivu atu diskute projetu ba promosaun peskas kosteiru sustentável ba ekonomia azúl.

Iha intervensaun Sekretáriu Estadu Peskas nian, hato’o agradese ba Governu Japaun ne'ebé ajuda no kontribui ba dezenvolvimentu nasionál dezde Timor-Leste independénsia no iha biban ida ne'e Governu Japaun nafatin suporta dezenvolvimentu peska.

Agradese mós ba JICA ho nia ekipa suporta dezenvolvimentu peska iha Timor-Leste liu programa no atividade Projetu ba Promosaun Peska Kosteira Sustentavel iha munisipiu sira mak hanesan benefisiariu no sei hetan benefisia direta husi projetu ida ne'e.

Bazea Notas Diskusaun no Deskrisaun Projetu ne'ebé mak asina husi Ministro da Agricultura, Pecuaria, Pescas e Florestas ho Chefe Reprezentativu JICA iha Timor-Leste iha loron 23 Dezembru 2024 katak projetu sei hala'o ho durasaun tinan 3 nia laran ho input sira haktuir iha Deskrisaun Projetu.

Objetivu projetu ida ne’e atu dezenvolve kapasidade Direção Geral Pesca, Aquicultura e Gestão de Recursos Aquaticos no komunidade konsteira liuliu peskador iha munisipiu sira mak hanesan benefisiariu liu programa treinamentu no Project Inputs hanesan deskreve iha Deskrisaun Projetu ida ne’e.

“Tuir ita hatene, Atividade projetu hahu ona hala’o levantamentu no atividade relativa seluk iha tinan 2025 liubá husi ekipa JICA koopera hamutuk ho Direção Geral Pesca, Aquicultura e Gestão de Recursos Aquaticos”.

Nia afirma, iha enkontru ida ne’e, ekipa projetu sei aprezenta nia rezultadu progresu no pontu diskusaun balun.

Ikus, nia husu ba partisipante hotu atu hala’o diskusaun ho ativu no aprezenta ideia konstrutivu atu nune’e hatuur planu ne’ebé di’ak atu bele benefisia ba Direção Geral Pesca, Aquicultura e Gestão de Recursos Aquaticos, peskadór no parte sira mak envolve iha atividade peska iha munisípiu destinadu.