Iha loron 19 Fevereiru 2026, Reprezentante husi DNEE (Direcção Nacional de Emprego Estranjeiru), Koordenador Labour Sending Unit (LSU) , Sr. Euliterio Borges, D.S C. Lemos, hamutuk ho reprezenta husi DFAT (Department of Foreign Affairs and Trade) Australia, hala'o vizita ba fatin formasaun forklift hodi observa direitamente atividade treinamentu operasaun forklift ba kandidatu traballador sira husi Pacific Australia Labour Mobility (PALM) Scheme. Formasaun ne'e fasilita husi CALTEC Group no finansia husi Guvernu Australia.

Formasaun ne'e mak hanesan parte ida husi implementasaun komitmentu programa PALM liu husi projeitu "Scale Up" iha Timor Leste no Australia nia parseria ba abilidade no mobilidade laboral nia mahon. Inisiativa ida ne'e iha objetivu prinsipál rua: Hasae abilidade operasaun forklift ba kandidatu sira tuir padraun Australia nian, atu sira prontu kompete iha merkadu servisu iha Austrália. Ajuda loke dalan luan liu tan ba kandidatu sira hodi hetan oportunidade servisu iha futuru liu husi programa PALM nian. Hafoin formasaun remata, sira sei hetan sertifikadu ne'ebé rekoñese husi empregadór sira iha Austrália. Bainhira sira mobiliza ba Australia, sira sei bele iha oprtunidade atu tuir teste iha Australia hodi hetan lisensa ba serbisu operasaun fortklift nian iha Australia.

Durante vizita, Sr. Eliterio ho reprezenta DFAT haree direitamente prosesu formasaun no mós diskute ho CALTEC Group kona-ba stratejia atu garante katak formasaun ne'e efetivu ba kandidatu sira.

Vizita ne'e hatudu kompromisu forte husi Governu Timor-Leste liu husi DNEE no Governu Austrália liu husi DFAT atu hametin kolaborasaun iha asuntu PALM, liu husi preparasaun kandidatu sira ho skill ne'ebé di'ak no preciza iha merkaadu Australia nian.