Díli, 23 Fevereiru 2026

Eselénsia Sekretáriu Estadu Kooperativas (SEKoop), Eng. Arsénio Pereira da Silva, M.Agr., partisipa iha Reuniaun dahuluk Konsellu Nasional Organizasaun Prezidénsia ASEAN (ACNOC, Sigla Engles), ne’ebé realiza iha Edifísiu Ministério das Finanças, Aitarak Laran, Dili.

Reuniaun ne’e lidera direta husi Eselénsia Primeiru-Ministru Xanana Gusmão no partisipa husi membru sira husi IX Governu Konstitusionál, ho objetivu atu prepara no koordena responsabilidade Timor-Leste nian iha kontestu Prezidénsia ASEAN.

Iha reuniaun ne’e, Governu diskute planu estratéjiku no mekanizmu koordenasaun interministerial hodi asegura preparasaun ne’ebé di’ak no efetivu ba Timor-Leste nia envolvimentu iha Prezidénsia ASEAN. Partisipasaun SEKoop importante tebes atu integra setor kooperativas iha ajenda nasional no rejional, liuhusi kontribuisaun iha dezenvolvimentu ekonómiku inkluzivu.

Reuniaun dahuluk ida ne’e marka hahú husi série enkontru sira ne’ebé sei realiza hodi hametin koordenasaun entre ministériu no instituisaun relevantes, atu garante Timor-Leste bele desempeña ho di’ak nia papel iha nível rejional.