𝐃𝐢𝐥𝐢, 𝟏𝟗 𝐅𝐞𝐯𝐞𝐫𝐞𝐢𝐫𝐨 𝟐𝟎𝟐𝟔- Ministru Komérsiu no Indústria, Sr. Nino Pereira, akompaña husi Diretora Regulasaun Komersial no Protesaun Konsumidors, no Diretor Komérsiu Externo, hala’o enkontru koordenasaun ho Inspetora-Geral Autoridade de Inspeção e Fiscalização da Atividade Econômica, Sanitária e Alimentar (AIFAESA, I.P.), Sra. Odete Viegas, hamutuk ho nia ekipa iha sala AIFAESA, I.P., Matadouro, Díli.

Enkontru ida ne’e iha objetivu atu hametin kooperasaun entre MCI no AIFAESA, liuhosi reforsa relasaun institusionál no establese mekanizmu kolaborasaun ne’ebé klaru no sustentável, hodi promove dezenvolvimentu tékniku ba setór komérsiu no indústria.

Diskusaun mak fó enfase ba área sira importante hanesan:

• Liña koordenasaun servisu entre institusaun rua.

• Lisensiamentu indústrial ba operadór ekonómiku sira.

• Espasu ba Sentru Inkubasaun Negósiu.

• Implementasaun legislasaun relevante, inklui:

◦ DL Nº. 04/2011 kona-ba krime asambarkamentu no espekulasaun.

◦ DL Nº. 29/2011 kona-ba presu justu

◦ DL Nº. 95/2022 kona-ba rejime jerál regras orijen.

• Regulamentu kona-ba língua ba etiketa produtus.

• Sertifikasaun ba produtu exportasaun.

Ministru Nino Pereira subliña katak kooperasaun ne’e sei fó kontribuisaun boot ba proteksaun konsumidor, promosaun transparénsia merkadu, no sustenta dezenvolvimentu indústrial iha Timor-Leste.