DÍLI – Ohin, 23 Fevereiru 2026, Ministériu Juventude, Desportu, Arte, no Kultura (MJDAK), liuhosi Gabinete Inspesaun no Auditoria Interna, hahú workshop loron tolu kona-ba Direitu no Regulamentu Administrativu. Eventu ne’e fó plataforma ba funsionáriu no parseiru sira atu fahe koñesimentu kona-ba regulamentu administrasaun públika.

Enkontru ne’e loke husi Xefe Gabinete MJDAK, Sr. Egas Barros Guterres Godinho, reprezenta Ministru. Iha ninia intervensaun, Xefe Gabinete subliña katak, integridade iha servisu, hahú hosi dadeer to’o lorokraik, tenke bazeia ba lei sira ne’ebé aplikavel hodi alkansa dezenvolvimentu nasionál.

PONTU KRÍTIKU NE'EBÉ DISKUTE:

• Ezekusaun OJE 2026: Oinsá jere orsamentu ho transparénsia tuir Dekretu-Lei foun.

• Prevensaun Korupsaun: Komprensasaun kle'an ba Lei n.º 7/2020 hodi evita iregularidade.

• Seguransa Sosiál: Aprezentasaun husi ekipa INSS kona-ba protesaun ba traballadór sira-nia direitu iha vida tomak.

• Aprovizionamentu: Regra foun ba kontratu públiku no doasaun ba federasaun sira.

Hanesan sasin ba komitmentu MJDAK, workshop ne'e mós foka ba oinsá parseiru sira (Federasaun no Organizasaun Juventude) bele ezekuta fundu sira ho responsabilidade aas, hodi asegura katak la iha "falla" iha dokumentasaun no implementasaun.

Partisipa iha atividade ne'e mak dirigente sira, kargu xefia, funsionáriu kazuál, no reprezentante husi organizasaun juventude sira no federasaun desportiva oioin.

#MJDAK #Integridade #Transparénsia #AuditoriaInterna #Juventude #Desportu #TimorLeste #INL #SeguransaSosiál #MídiaMJDAK