𝗗𝗶𝗹𝗶,𝟭𝟵 𝗙𝗲𝘃𝗲𝗿𝗲𝗶𝗿𝘂 𝟮𝟬𝟮𝟲

Embaixador Indonezia nian iha Timor-Leste, Okto Dorinus Manik hala'o vizita bá iha Ministériu Obras Públikas, Caikoli, kinta-feira ne’e hasoru malu ho Ministru Obras Públikas, Samuel Marçal hodi hato’o agradesementu bá kooperasaun servisu nian durante ninia mandatu iha Timor-Leste hanesan Embaixador Indonezia.

Dadaun ne’e embaixador Okto Dorinus Manik, foin simu ona pose no sei asume knaar foun nu'udar Embaixador Indonezia bá Papua Nova Guiné.

Perante ninia misaun iha Timor-Leste hahu’u husi (2021-2025/2026), nia fokus bá hametin relasaun bilaterál, kooperasaun ekonómika no asuntu fronteira nian.

Iha enkontru despedida ne'e, Ministru Obras Públikas, Samuel Marçal, hato'o agradesimentu boot bá Embaixador Okto Dorinus Manik tanba ninia dedikasaun hodi hametin relasaun entre nasaun rua, liuliu iha área dezenvolvimentu.

Pontu importante husi agradesimentu ne'e mak:

• Kooperasaun Téknika: Ministru Samuel rekoñese kontribuisaun Indonézia nian liuhusi fahe koñesimentu no kapasitasaun bá tékniku timoroan sira iha setór infraestrutura.

• Projetu Estratéjiku: Apoiu bá koordenasaun projetu sira ne'ebé liga fronteira rai-maran, ne'ebé fasilita movimentu sasan no ema.

• Spiritu Solidariedade: Ministru apresia mós Embaixador Okto ninia proximidade ho Governu Timor-Leste ne'ebé sempre nakloke bá diálogu hodi rezolve dezafiu komum sira.

Ministru Samuel Marçal mós haraik votus susesu bá kargu foun ne'ebé Embaixador Okto sei asume iha Papua Nova Guiné, hodi hein katak lasu amizade ne'e sei kontinua firme maske misaun iha Dili remata ona.

https://sdi.gov.tl/ministerio/presrealease/create 

𝗠𝗶́𝗱𝗶𝗮-𝗠𝗢𝗣