Aileu, 23 Fevereiru 2026 – Sekretáriu Estadu Kooperativas (SEKoop), Eng. Arsénio Pereira da Silva, M.Agr., hamutuk ho parseiru Heineken no autoridade Munisípiu Aileu, realiza koilleta Bafo Kayrala ba epóka dahuluk tinan 2026 nian hamutuk hektares 2 resin, iha Sentru MOKATIL Sarau, Aldeia Banderahun, Suku Liurai, Postu Administrativu Aileu.

Atividade ne’e hanesan parte husi programa prioritáriu SEKoop iha IX Governu Konstitusionál hodi promove no dezenvolve produtu Bafo Kayrala hanesan materia-prima potensial ba indústria no konsumasaun lokal. Koilleta dahuluk tinan ida ne’e hatudu katak produsaun iha área refere lao diak no iha perspetiva favorável ba merkadu.

Iha ninia intervensaun, SEKoop fó apresiasaun ba produtór no kamponez sira inklui funsionáriu tékniku ne’ebé fó apoiu durante prosesu plantasaun to’o koilleta. Nia hateten katak Bafo Kayrala iha kapasidade atu koilleta to’o dala tolu iha tinan ida tuir kondisaun rai no jestaun agríkola.

“Produtu ida ne’e la’ós deit bele sai materia-prima ba serveja, maibé mos bele fornese ba programa merenda eskolar no industria seluk. Ninia residu sira bele uza hanesan hahan ba animal, nune’e kadeia valor husi Bafo Kayrala ida ne’e luan tebes no bele aumenta rendimentu ba kamponez sira,” hateten SEKoop.

SEKoop mos husu ba produtór sira atu tau atensaun ba kualidade, liu-liu iha faze pós-koilleta, atu asegura konfiansa husi kompania komprador sira, inklui Heineken ne’ebé sei sosa produtu ne’e hodi prosesa sai serveja.

Iha parte seluk, reprezentante Heineken, Sra. Filomena Filipe hato’o katak amostra Bafo Kayrala husi Timor-Leste halo ona teste iha Olanda no rezultadu hatudu kualidade diak. Kompania ne’e mos iha esperiénsia produz serveja husi shorghum iha nasaun seluk, hanesan iha Nigeria.

Seremónia koilleta ne’e hetan prezensa husi Reprezentante Prezidenti Autoridade Munisípiu Aileu aktual Admistrador Postu Administrativu Aileu Diretór Geral SEKoop Eng. Olderico Lopes, Komandante PNTL Munisípiu Aileu, kargu diresaun no xefia sira, autoridade lokal, Reprezentante Edukasaun no Saúde inklui mos kamponez sira iha área Sarau. Atividade ne’e konsidera hanesan pasu importante hodi hametin kolaborasaun entre governu, setor privadu no komunidade agríkola iha Munisípiu Aileu.