Díli, 24 Fevereiro 2026- Peskizadór ne'ebé bazeia iha universidade Malázia no Filipina hala’o enkontru ho Xefe Gabinete Ministru Sr. Julito Soares no Asesor Prinsipal Sr. Francisco Borlaco iha sala reuniaun MCI.

Enkontru ne’e koa’lia kona-ba, inisiativa peskiza foun ida hala’o iha Timor-Leste, ne’ebé foka intersesaun feto sira-nia partisipasaun iha ekonomia dijitál. Projetu ne’e, hetan apoiu husi 𝘼𝙎𝙀𝘼𝙉 𝙄𝙣𝙨𝙩𝙞𝙩𝙪𝙩𝙚 𝙛𝙤𝙧 𝙋𝙚𝙖𝙘𝙚 𝙖𝙣𝙙 𝙍𝙚𝙘𝙤𝙣𝙘𝙞𝙡𝙞𝙖𝙩𝙞𝙤𝙣 𝙖𝙣𝙙 𝙩𝙝𝙚 𝙀𝙘𝙤𝙣𝙤𝙢𝙞𝙘 𝙍𝙚𝙨𝙚𝙖𝙧𝙘𝙝 𝙄𝙣𝙨𝙩𝙞𝙩𝙪𝙩𝙚 𝙛𝙤𝙧 𝘼𝙎𝙀𝘼𝙉 𝙖𝙣𝙙 𝙀𝙖𝙨𝙩 𝘼𝙨𝙞𝙖 (𝙀𝙍𝙄𝘼).

Estudu ne’e iha objetivu atu fornese imajen ida ne’ebé klaru liu kona-ba oinsá feto sira envolvimentu ho ferramenta no plataforma dijitál sira iha Timor-Leste, no oinsá atividade sira-ne’e kontribui ba reziliénsia ekonómika no harii dame.

Ministériu Komérsiu no Indústria nu’udar parseiru xave ida iha esforsu ne’e. Investigadór sira iha interese liuliu atu aprende kona-ba inisiativa sira ministériu nian atu apoia feto emprezária sira no negósiu ki'ik sira (MPeME) hodi adapta ba merkadu dijitál sira. Kolaborasaun ida-ne'e hein atu destaka dezafiu atuál sira no oportunidade emerjente sira ba empreza sira ne'ebé lidera hosi feto sira.

Enkuantu estudu ho objetivu atu buka komprende oinsá feto sira-nia partisipasaun ekonómika, inovasaun dijitál, no dame no seguransa interseta iha kontestu oioin. Ekipa paralelu sira mós hala'o hela peskiza hanesan iha Filipina no Kamboja, hodi subliña importánsia rejionál hosi asuntu ne'e.

Ekipa ne’e iha esperansa atu fornese vizaun jerál komprensivu ida kona-ba feto sira-nia papél iha ekonomia dijitál iha Timor-Leste, enkuantu oferese mós rekomendasaun sira ba polítika no prátika ne’ebé avansa pás sustentável iha rejiaun tomak.