Ainaro, 24 Fevereiru 2026 – Sekretaria Estadu Kooperativas (SEKoop), liu husi Diresaun Nasionál Promosaun Produtus Kooperativas (DNPPC), kontinua halo promosaun produtu lokal Bafo Kayrala iha Escola Bázika Central 05 Setembru Kassa (EBC), Suku Kasa, Postu Administrativu Ainaro, Munisípiu Ainaro.

Inisiativa ida ne’e foka ba introdusaun produtu final hanesan biskuit, sasoro, cokelat no pão ba estudante sira, nu’udar parte husi programa governu atu integra produtu lokal iha merenda eskolar. Objetivu prinsipal maka atu hadi’a nutrisaun no saúde estudante sira, nune’e mos enkoraja konsumu no valorizasaun ba produtu agríkula lokal.

Iha seremónia ofisiál, Sekretáriu Estadu Kooperativas, Arsénio Pereira da Silva, hatete katak EBC 05 Setembru Kassa sai projetu pilotu iha Munisípiu Ainaro ba promosaun produtu final Bafo Kayrala. Tuir nia, programa ne’e la’ós de’it fó benefísiu ba estudante sira, maibé mos fortalece ekonomia kooperativa no agrikultór sira iha Timor-Leste.

Nia mos hateten katak promosaun ne’e fó oportunidade ba estudante no komunidade eskolar atu koko diretamente produtu Bafo Kayrala no fó sugestaun hodi hadi’a liután ninia kualidade.

Iha parte seluk, PAM Ainaro, Manuela Georgina Corte Real, fó apresiasaun ba SEKoop tanba konsege integra produtu Bafo Kayrala hanesan aihan alternativu iha merenda eskolar. Tuir matadalan programa, 75% husi merenda eskolar tenki mai husi produtu lokal. Ho presensa Bafo Kayrala, bele ajuda kompleta nesesidade ne’e.

Diretór EBC 05 Setembru Kassa, Silvino Lopes, hato’o katak total estudante hamutuk 473, no hotu-hotu sei benefisia husi promosaun ne’e. Nia mos hatete katak atividade ida ne’e ajuda estudante sira komprende importánsia konsumu produtu lokal ne’ebé iha valor nutrisaun no fó apoiu ba agrikultór sira iha rai laran.

Promosaun produtivu final husi Bafo Kayrala iha EBC 05 Setembru Kassa ne’e mak ba dala sia. Antes ne’e, atividade hanesan hala’o ona iha munisípiu sira hanesan Covalima, Liquiça, Lautém, Bobonaro, Manufahi, RAEOA no Aileu.

Atividade ne’e hetan partisipasaun husi autoridade lokal sira, inklui PNTL, Diresaun Munisipal Edukasaun, Agrikultura no Saúde, no profesor sira.