𝑍𝑢𝑚𝑎𝑙𝑎𝑖, 25 𝐹𝑒𝑣𝑒𝑟𝑒𝑖𝑟𝑢 2026

Ekipa Interministerial konstitui TIMOR GAP, E.P., MPRM, MJ, MJDAK, MOP, MPIE, MAPF, MAE MACLN no MI sosializa Segunda-Feira ne’e, rezultadu identifikasaun no planu realiñamentu auto Estrada Zumalai-Natarbora ba komunidade afetada iha Zumalai, molok halo reidentifikasaun ba rai no propriedade.

Antes ne’e, governu planeia konstrui korridór auto Estrada hamutuk atus rua, ho distánsia liu kilometru 76, maibé depoiz halo análize ba dadus identifikasaun husi fulan Jullu to’o Outubru tinan 2025, identifika nesesidade ajustamentu ho tékniku no sósiu-ekonómika, hodi reduz koridór husi metro atus rua ba atus ida no halo realiñamentu ba Auto Estrada iha pontu neen ne’ebé pertense ba área Hatu-udo, Betanu, Wedauberek, Uma Berloik no Natarbora, hodi evita prejuízu maka’as, ba fasilidade públika hanesan torre eletresidade, eskola, kliníka, igreija no uma komunidade nian.

Sua Eselénsia Ministru Petróleu no Rekursus Minerais, Francisco da Costa Monteiro destaka importánsia husi auto Estrada no apela entidade hotu-hotu nia apoiu, tanba obra sei fasilita mobilizasaun rekursus petrolíferu no mineral ne’ebé mak extrai husi onshore no offshore ba área seluk iha futuru, hodi impulsiona ekonomia nasional. Prosesu aprovizionamentu ligadu ho auto Estrada rejista progressu di’ak no aspetu ki’ik ne’ebé mak sei resolve, hafoin aprezenta ba Konsellu Ministru iha tempu besik no realiza vizita nesesária ba nasaun seluk, hodi mobiliza finansiamentu ba konstrusaun auto Estrada iha tinan ida ne’e.

Ba Sua Eselénsia Ministru Monteiro, dezde inísiu to’o agora la iha impedimentu ruma husi komunidade no entidade seluk, tanba ne’e fiar katak, inisiativa ne’e ajuda komunidade afetada atu kompriende mudansa ne’ebé mai husi análize ba prosesu identitifikasaun, hodi dudu lalais prosesu implementasaun, bazeia ba rekursu existente.

Sorin seluk, governu mos sei resolve seksaun husi auto estrada ne’ebé hetan estragus durante udan boot iha tinan 2018, bazeia ba análize kle’an ba estrutura rai ne’ebé realiza husi IGTL, I.P. no TIMOR GAP, E.P., no prosesu ekualifikasaun auto Estrada iha hela tenderizasaun ne’ebé administra husi Komissaun Nasionál Aprovizionamentu – CNA iha fulan Janeiru ho expetativa katak, selebrasaun kontradu sei realiza iha tempu besik.

Señor Prezidente Autoridade Munisípiu Covalima, Miguel Cardoso, Veteranu Alin Laek no Sekretariu Jerál Task Force Veteranu ba Asuntu Interese Nasionál, Jorge Alves - We Moris mos apela kontribuisaun husi veteranu no entidade hotu, hodi kontribui ba implementasaun projetu Auto Estrada no Tasi Mane, hodi impulsiona prosesu dezenvolvimentu nasionál.

Faze tuir mai, sei halo reindentifikasaun ba rai no propriedade ne’ebé mak afetadu husi projetu, relasiona ho realiñamentu auto Estrada no redusaun korridór husi metro atus rua ba atus ida, ne’ebé sei konta ho apoiu no kolaborasaun husi komunidade husi Zumalai to’o Natarbora.