Dili loron 25, fulan-Fevereiru, tinan 2026, Sekretáriu Estadu ba Formasaun Profisionál no Empregu, Sua Exelénsia Rogério Araújo Mendonça L.Ed, hala’o enkontru ho Embaixadór Timor -Leste iha Vietnam Sr. João Perreira hodi ko’alia kona-ba oportunidade empregu ba joven Timor-oan sira ba servisu iha nasaun Vietnam.

Sekretáriu Estadu hato’o bemvindu ba embaixadór Timor-Leste iha Vietnam no subliña katak enkontru ne’e hanesan momentu importante ba futuru juventude Timor nian.

Embaixadór Timor-Leste iha Vietnam Sr. João Perreira esklarese katak enkontru ne’e importante no prioridade tanba formasaun profisionál no empregu mak parte fundamental husi protofullo SEFOPE.

“Sira hakarak rekruta joven Timor-oan sira tanba kultura di’ak, badinas no kapasidade servisu, Ofertas empregu iha Vietnam bele hahu ho durasaun tinan rua, ho benefísiu hanesan seguru mediku no kapasitaun profisionál,” tenik embaixadór João Perreira.

Sekretáriu Estadu katak oportunidade ida ne’e fó espasu di’ak ba juventude Timoroan no buat ne’ebé presiza hatene kultura, ambiente no lei Vietnam nian.

“Ne’e hanesan oportunidade di’ak ida tan atu fo tan espasu ba Timor oan sira, maibe buat ne’ebé ita presiza hatene mak sira nia kultura,ambiente no lei sira ne’ebé iha hodi Regula ita nia Timor oan sira, tenik Sekretariu Estadu”

Sekretáriu Estadu mos informa sei kontinua ko’alia ho Governu Vietnam kona-ba selebrasaun MoU atu nune’e bele Fasilita Ona Joven sira ba iha Markadu Traballu nasaun refere.