𝑳𝒂𝒖𝒕𝒆𝒎, 02 𝑴𝒂𝒓𝒔𝒖 2026

Sua Eselénsia Ministru Petróleu no Rekursus Minerais, vizita área konsesaun ba explorasaun maganesiu husi Estrella Murak Rai Lda – EMR (subsidiáriu husi Estrella Resources Limited no Murak Rai Timor, E.P., ho partisipasaun 70:30 porsentu) iha área àrea Ira-Miri, Suku Maina I, Postu Administrativu Lautem.

Governu avalia pozitivamente ba deskobrimentu rezerva maganesiu klase mundiál ne’ebé bele komersializa iha futuru no apresia susesu husi Estrella Murak Rai Lda – EMR, inklui apoiu husi komunidade, hodi halo extrasaun ba maganesiu ba teste merkadoria. Tuir lisensa ne’ebé ANM, I.P., atribui iha tinan 2024, atividade prospesaun no peskiza realiza durante tinan hat, maibé empreza atinji susesu bo’ot, iha de’it tinan ida ho balun.

Sua Eselénsia Ministru fiar katak, waihira tanba iha faze minerasaun, sei rezulta oportunidade empregu ba joven sira husi Lautem no Munisípiu seluk no impulsiona mos atividade ekonómika seluk, tanba ne’e apela kontribuisaun husi komunidade hotu ba atividade explorasaun, iha Ira-Miri ne’ebé konsideradu hanesan projetu pioneiru ne’ebé sei tulun ekonomia nasaun nian iha futuru.

CEO Estrella Resoruces, Señor Christopher Daws mos apresia koolaborasuan di’ak husi MURAK RAI TIMOR, E.P no komuniade Maina I no rai na’in, hodi tulun realizasaun atividade explorasaun no jeolojista timor-oan ne’ebé maki ha vontade di’ak hodi aprende ho empreza Estrella Resources iha kontestu explorasaun.

Jeólogu no jeofíziku husi Estrella Murak Rai Lda – EMR konfirma deskoberimentu rezerva maganesiu, waihira halo perfurasaun ho profunidade metro 12, maibé iha expetativa bo’ot, bazeia husi dadus estrutura rai no estratigrafia (deskrisaun no klasifikasaun kamada fatuk) katak, mapeamentu mineralizasaun iha Maina I, iha kontinuasaun ba parte tasi-feto no mos iha possibilidade iha liga ba Home no Leuro.

Atu konfirma kualidade no rezerva maganesiu, ekipa téknika sira uza rejistividade jeolójika (métodu jeofíziku ne’ebé sukat kapasidade material iha suprefisie, trava korrente elétriku, hodi identifika formasaun jeolójika, bazeia ba rejistividade) no uza métodu Induced Polarization – IP (métodu jeofíziku hodi detekta material iha rai okos, liu-liu mineral metáliku, rai-mena no bé) ne’ebé mak tulun separa tahu no maganes, hafoin halo prosesamentu no interpretasaun ba dadus.