Eventu ne’e hetan mos partisipasaun husi representante Embaixada Austrália, inklui Primeira Sekretária, Sra. Kalo Tafolo, no Segundu Sekretária, Sr. Declan. Mos partisipa Senior Manager PLMSP, Sr. Geraldo Ximenes, no Asesór Programa, Sr. Mark Nickholson.

Reflesaun ne’e integra aproximasaun MERL (Monitoring, Evaluation, Research and Learning), ne’ebé foka ba monitorizasaun, avaliasaun, peskiza no aprendizajen atu garante kualidade impelmetasaun program ida ne’e

Iha nia intervensaun, Diretór João Correia Pereira hateten katak reflesaun importante atu hare fila fali implementasaun programa no identifika área ne’ebé presiza hadia. Nia mos hato’o agradese ba PLMSP no ekipa LSU ba apoiu ba programa, inklui inisiativa SCALE UP.

Diretór subliña fokus importante rua hanesan: Inkluzaun Sosial , fortaleze igualdade gêneru iha programa. No Reintegrasaun – Ne’eb’e apoiu traballadór sira atu uza rekursu no esperiénsia husi Austrália hodi kria sustentabilidade iha rai-laran.

Nia konvida partisipante sira atu kontribui ho hanoin konstrutivu:

“Saida mak ita halo la di’ak, ita hadi’a. Saida mak suksesu ona, ita kontinua hametin halo diak liu tan ba futuru.”

Partisipasaun husi DNEE no Embaixada Austrália hatudu kompromisu konjuntu atu melhora liu tan programa obilidade laboral, ho foku ba dezenvolvimentu traballadór, reintegrasaun sustentável no inkluzaun gêneru.