DILI, 5 Marsu 2026 Sua Exelénsia Sekretáriu Estadu Formasaun Profisional no Empregu (SEFOPE) hala'o ho entuziazmu seremónia asina deklarasaun ba traballador timoroan nain 135 (mane 110 no feto 25) ne'ebé sei mobiliza ba servisu iha Austrália. hamutuk ho empregador sira hanesan DOWN TO EARTH, CARES FARM, TASMANIA BERRIES, PINATA FARM, JOB AUSTRALIA, no QUEENSLAND BERRIES.

Iha seremónia ne'e, partisipa direita mós husi Segundu Sekretáriu Embaixada Austrália, Sr. Declan Hickey, ho nia delegasaun, Diretor DNEE, Sr. João Correia Pereira, no Chefe Departamentu Reintegrasaun DNEE inklui Jestor Senior PLMSP, familia no traballladores.

Alende aprezentasaun relatóriu husi Diretor DNEE, Sekretáriu Estadu ba Formasaun Profisionál no Empregu Sua Exelénsia Rogério Araújo Mendonça L.Ed, hato'o mensajen xave ne'ebé pertinente no váliozu tebes ba traballadores, família, no partisipantes sira hotu:

"Ha'u nia saudasaun no agradese boot ba ita boot hotu ne'ebé mak halibur iha fatin ida-ne'e ho kondisaun diak.

Primeiramente, ha'u hakarak hato'o ha'u nia agradese ba Maromak Criador, ne'ebé hamutuk ho ita iha viajen tomak.

Ha'u mós hakarak hato'o apresiasaun boot ba Governu Austrália nia komitmentu forte no konsistente ba Programa PALM (Pacific Australia Labour Mobility). Suporta ne'e, liu husi PLMSP (Pacific Labour Mobility Support Program).

*Iha inísiu tinan ida ne'e, Primeiru-Ministru Austrália no Timor-Leste hasai ona Deklarasaun Konjuntu (Joint Statement) ho Governu Timor-Leste atu aumenta númeru traballador timoroan ba servisu Austrália liu10.000 iha tinan 2028. Area servisu sira la'ós de'it iha setór agrikultura, maibé mós iha setór sira seluk hanesan Aged care, Prosesamentu na'an, no hospitalidade. Ida ne'e hatudu katak konfiansa no apresiasaun ba abilidade Timor-oan kontinua aumenta iha área oi-oin."

Traballador sira hotu mak fator determinante atu realiza komitmentu ida-ne'e. Imi nia dezempeñu servisu ne'ebé diak sei ajuda imi atu hetan rekursu no manán konfiansa husi empregadores, no sei loke dalan luan liu ba Timor-oan sira seluk iha futuru.

Governu nia rekomendasaun boot ba ita boot sira mak atu halo jestaun ho diak ba rekursu hotu ne'ebé imi hetan husi imi nia serbisu. Bainhira fila mai Timor, imi bele sai hanesan empreendedor ida ne'ebé bele ajuda suporta ekonomia família, komunidade, no nasaun.

Iha tempu badak nia laran, Governu sei lansa mós Portal Traballador Ida, plataforma refere sei ajuda ita boot sira atu asesu rasik imi nia perfil, estatus rekrutamentu,

atualiza skill, no seluk-seluk tan. Inklui mós, imi bele uza plataforma ne'e hanesan biblioteka digital ida hodi aprende ingles no matéria sira seluk ne'ebé nesesáriu.

Ikus liu, atu fó hanoin nafatin: Ita boot sira ba Austrália lori ho símbolu RDTL. Tanba ne'e, evita atu pratika arte marsial ne'ebé bele hamosu asaun violénsia sira ba Timor-oan seluk.

Adisionalmente importante tebes atu ita hotu komprende katak: SEFOPE nia papel mak atu fasilita prosesu administrasaun. SEFOPE la iha kompeténsia atu halo kontratu direitamente ba traballador ida. Rekrutamentu no desizaun kona-ba kontratu ne'e empregador sira nia kbiit no kompeténsia. SEFOPE nia kompromisu mak atu garante katak iha prosesu selesaun, ita sempre fó oportunidade ne'ebé justu no hanesan ba ema hotu-hotu, la ho diskriminasaun ba ida-idak nian diferensa" Dehan Sekretariu Estadu.

Alende diskursu husi Sekretaria Estadu, Segundu Sekretaria Embaixada Australia mos hato apresiasaun profunda ba SEFOPE-DNEE ne'ebé servisu makas tebes ho Governu Australia hodi halo program ida ne'e sai posivel no sekunda katak "Program ida ne'e bele ajuda ekonomia nasaun rua, no ami hakarak kontinua atu hare impaktu ne'ebe traballador sira sei halo ba sira nia familia nasaun no komunidade, enkoraja mos tablaldor sira atu fahe imi nia kultura nebe furak bain hira imi hela iha Australia ami espera sesaun PDB sei ajuda imi atu bele susesu iha programa PALM" Dehan Senhor Declan.

Seremónia ne'e remata ho atmosfera kapas no traballador sira hatudu entuziazmu boot atu partisipa iha programa PALM, ho esperansa atu hadi'a sira nia moris no kontribui ba ekonomia nasaun nian.