𝑷𝒂𝒍𝒂́𝒔𝒊𝒖 𝑮𝒐𝒗𝒆𝒓𝒏𝒖, 05 𝑴𝒂𝒓𝒔𝒖 2026

Kompaña Finder Energy atualiza investimentu kampu mina offshore - Jahal no Kuda Tasi ne’ebé prevé atu halo produsaun iha tinan 2027, ba Sua Eselénsia Primeiru Ministru, Kay Rala Xanana Gusmão ne’ebé akompaña husi Sua Eselénsia Ministru Petróleu no Rekursus Minerais, Francisco da Costa Monteiro.

CEO Finder Energy, Bronwyn Barnes, informa katak, konklui ona dezeñu enjeñaria, hamutuk ho TIMOR GAP, E.P., sosa ona ró tanke (Floating Production, Storage, and Offloading - FPSO) husi Europa, no sei foti desizaun final ba investimentu iha fulan Juñu tinan ida ne’e, molok hakat ba produsaun iha tinan 2027.

Tuir planu, ró tanke FPSO, sei to’o iha kampu produsaun iha tinan 2027, hodi extrai mina husi tasi-okos, hafoin transporta no komersializa iha Singapura. Empreza extrai ona amostra husi kampu Jahal no Kuda Tasi no konfirma kualidade mina kondensada, tuir indikadór husi Industrial production Index – IPI.

Finder Energy apresia teb-tebes apoiu máximu husi governu no mos Autoridade Nasionál Petróleu – ANP, I.P., no promete atu servisu hamutuk ho Ministériu Petróleu no Rekursus Minerais no TIMOR GAP, E.P., hodi alkansa produsaun mina iha Kampu Jahal no Kuda Tasi iha tinan 2027.

Kampu Jahal no Kuda Tasi ne’ebé lokaliza iha soberania marítima Timor-Leste nian, iha rezerva mina kondensadu millaun 25 barrís. Kampu Jahal no Kuda Tasi prevé halo produsaun durante tinan 9 nia laran, maibé bele extende ba liu tinan 10, waihira akomoda kampu ne’ebé lokaliza Jahal no Kuda Tasi.