Maliana, 09 Marsu 2026 – Sekretáriu Estadu Kooperativas (SEKoop), Arsénio Pereira da Silva, hamutuk ho Autoridade Munisípiu Bobonaro no parseiru sira realiza atividade koilleta produtu Bafo Kayrala iha área hamutuk hektares 20, iha Suku Ritabou, Postu Administrativu Maliana.

Atividade ne’e hanesan parte husi programa prioritáriu SEKoop iha IX Governu Konstitusionál atu promove no dezenvolve produtu Bafo Kayrala hanesan matéria-prima potensial ba indústria no konsumasaun lokal. Koilleta dahuluk iha tinan ida ne’e hatudu katak produsaun iha área refere lao diak no iha perspetiva favorável ba merkadu.

Iha ninia intervensaun, SEKoop fó apresiasaun ba kamponez no produtór sira, inklui funsionáriu tékniku sira ne’ebé fó apoiu durante prosesu plantasaun to’o koilleta. Nia hateten katak Bafo Kayrala iha kapasidade atu koilleta to’o dala tolu iha tinan ida, tuir kondisaun rai no jestaun agríkola.

“Servisu hamutuk entre funsionáriu destakadu Munisípiu Bobonaro, Ministériu Agrikultura, no toos nain sira fó rezultadu ida ne’ebé diak. Ita tenki kontinua aumenta produsaun hodi kontribui ba hasa’e krésimentu ekonomia familiar no utiliza área produtivu sira ne’ebé abandona hela,” hateten Arsénio Pereira da Silva.

Kona-ba merkadu, produtu Bafo Kayrala bele utiliza ba konsumu lor-loron, fornese ba programa merenda eskolar hanesan fonte karbohidrat, no oferese mos ba kompania Heineken atu utiliza ba prosesu produsaun serveja.

Produtu Bafo Kayrala iha kadeia valor ida ne’ebé luan. Nia bele sai hanesan aihan ba ema, residu bele sai aihan ba animal sira, bele ajuda tahan erozão rai, no bele mos utiliza ba produsaun pão, biskuit, cokelate no produtu seluk tan, tuir kreatividade industriál.

Iha parte seluk, Xefe Suku Ritabou, Maximiano D. A., agradese ba SEKoop tanba fó apoiu ba komunidade iha atividade produtivu sira. Nia mos husu atu programa ne’e bele kontinua no habelar ba área produtivu sira seluk ne’ebé sei abandona hela, no garante merkadu ba produtór sira.

Seremónia koilleta ne’e hetan prezensa husi Reprezentante Prezidenti Autoridade Munisípiu Bobonaro, Sekretáriu Munisipal ba Asuntu Planeamentu, Administrador Postu Administrativu Maliana, Diretór Geral SEKoop, Eng. Olderico Lopes, Xefe Gabinete, Francisca L. de Araújo Simith, Komandante Polícia Nacional de Timor-Leste Eskuadra Maliana, lideransa lokal sira, reprezentante edukasaun no saúde, no mos World Vision International Timor-Leste, inklui kamponez sira iha área Ritabou.

#Média SEKoop#