𝗔𝗶𝗻𝗮𝗿𝗼, 𝟬𝟳 𝗠𝗮𝗿𝘀𝘂 𝟮𝟬𝟮𝟲

Primeiru-Ministru (PM), Kay Rala Xanana Gusmão akompaña husi Ministru Obras Públikas (MOP), Samuel Marçal hala'o observasaun bá progressu rehabilitasaun Igreja Parókia Imaculado Coração de Maria Maubisse, sábadu ne’e.

Primeiru-Ministru hala'o observasaun ne'e bainhira halo viajen hodi “Haree besik servisu munisipál Manufahi husi rezultadu avaliasaun kondisaun mínima” molok avansa bá eleisaun Governu lokál ne’ebé sei akontese iha 2027.

Rehabilitasaun ne'e inisiativa husi Pároku ho estrutura Konsellu Pastorál Parokiál tanba kondisaun edifísiu Igreja ne'ebé ladún di'ak ona.

Iha oportunidade ne'e Primeiru-Ministru mós haree ai samtuku bo'ot ne'ebé tuan ona no sai ameasa bá morru protesaun Igreja nian ho uma komunidade.

Observasaun ne'e akompaña direta husi Pároku, Padre João Soares ho estrutura Konsellu Pastorál Parokiál.

Igreja ne'e konstrui iha tinan 1994, inisiativa husi Pároku Padre Norberto do Amaral atuál Bispu Dioseze Sagrado Coração de Jesus Maliana ho kontribuisaun sarani sira nian, hetan apoiu hosi autoridade lokál ne'ebé finaliza iha tinan 2000.

Igreja ne'e inaugura husi Administradór Apostólika Dioseze Dili Dom Carlos Filipe Ximenes Belo, SDB iha tinan 2000.

Sarani sira iha Parókia ne'e kontente ho prezensa Primeiru-Ministru nian no simu ho antuziasmu tebes.

Iha oportunidade ne'e mós grupu muzikál Koremetan Maubisse anima Primeiru-Ministru ho múzika oioin.

https://sdi.gov.tl/ministerio/presrealease/create 

*𝗠𝗶́𝗱𝗶𝗮-𝗠𝗢𝗣*