𝗠𝗮𝗻𝘂𝗳𝗮𝗵𝗶, 𝟬𝟴 𝗠𝗮𝗿𝘀𝘂 𝟮𝟬𝟮𝟲

Primeiru-Ministru, Kay Rala Xanana Gusmão, akompaña husi Ministru Obras Públikas, Samuel Marçal, ofisialmente lansa no assina kontratu projetu rehabilitasaun estrada Betano (Manufahi) bá Natarbora (Manatuto) inklui projetu melloramentu sistema bee moos ne’ebé sei fornese bá komunidade sira iha Same Vila, atividade ne’e realiza iha eskola Sekundária Jerál São Miguel Arcanjo, Aldeia Rialau, Suku Letefoho, Postu Administrativu Same Vila, Munisipíu Manufahi, loron domingo ne’e.

Projetu rehabilitasaun estrada Betano bá Natarbora ne'e sai parte importante husi dezenvolvimentu kosta súl no ligadu ho vizaun estratéjika sira hanesan, konektividade projetu Kosta Súl: Estrada ne'e sei liga pontu estratéjiku sira iha kosta súl, inklui apoiu ba projetu Tasi Mane no planta LNG ne'ebé planeadu atu harii iha Natarbora.

Infraestrutura Baziku hanesan estrada, bee moos no eletrisidade sai hanesan komprimisiu ida husi IX Governu Konstitusionál hodi kria baze ba dezenvolvimentu povu no nasaun liuhusi hadi'ak sistema transporte no mós sistema fornesimentu bee moos ba komunidade sira.

Antes ne'e, iha loron 28 Setembru 2025, PM Xanana lansa ona mós fatuk dahuluk ba rehabilitasaun estrada husi Luak ba Betano iha munisípiu Manufahi.

Iha seremónia lansamentu ne’e PM Xanana apela ba komunidade liu-liu joven sira atu labele halo impedimentu ba obra sira, nune'e projetu bele remata tuir tempu ne'ebé determina hodi fó benefísiu ba ekonómia lokál

Entretantu projetu reabilitasaun estrada husi Betano ba Natarbora sei konstrui ba Kompañia tolu mák hanesan, Kompañia Linated Unipessoal Lda Timor-Leste, sei kaer projetu estrada pakote III husi KM 15+000 to'o 22+500 ho orsamentu montante $3,767483.31 durasaun servisu fulan 12, Kompañia Lizi Construction Unipessoal,Lda Timor-Leste, ho Orsamentu $3,669,237.29 sei kaer husi arterial A14 pakote IV durasaun servisu fulan 12. kompañia Tinolina Unipessoal,Lda Timor-Leste pakote V KM 30+000 to'o 38+657.39 ho Orsamentu montante $4,705,409.39 durasaun servisu fulan 12.

Marka prezensa iha seremónia assinatura kontratu ba projetu rehabilitasaun estrada Betano ba Natarbora no melloramentu sistema Bee Moos, Vise-Ministru Asuntus Parlamentares, Adérito Hugo da Costa , Sekretáriu Estadu Asuntus Toponímia no Organizasaun Urbana, Germano Santa Brites Dias,Sekretáriu Estadu Komunikasaun Sosiál, Expedito Dias Ximenes, Deputada Parlamentu Nasionál Komisaun C, Prezidente Komisaun C, Cedelízia Faria dos Santos Xefe bankada Partidu CNRT, Patrocínio dos Reis, autoriedade lokal, parte igreja reprezenta husi Amo Paróko Igreja Parókia Nossa Señora Assunsão Same Vila,Madre sira husi kongresaun salesiana, komunidade no estudante sira.

https://sdi.gov.tl/ministerio/presrealease/create 

*𝗠𝗶́𝗱𝗶𝗮-𝗠𝗢𝗣