Bobonaro loron 06 fulan Março 2026- Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos hala'o vizita kortejia ba eskola Primeiru no segundu Siklu Ensinu Báziku Filial Railuli ne'ebé lokaliza iha Suku Kowa, Postu Administrativu Balibo, Munisípiu Bobonaro.

Iha entrevista Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos, hateten ohin ekipa mai atu haree diretamente prosesu ensinu no situasaun sira ne'ebé eskola ne'e infrenta, tanba eskola refere fronteira ho Indonezia ho ida ne'e mak ita presiza haree didi'ak nune'e labele fó impaktu ba estudante sira.

"Estudante lubuk ida iha fatin ida ne'e, tanba eskola ne'e mak besik liu fronteira, estudante antuziasmu hodi eskola no aprende iha fatin ne'e. Ita la harii eskola foun ida, ita haree ba situasaun tomak ohin iha dalan ita haree estudante sira barak mak lao husi Suku Kowa ba to'o iha Balibo villa sira nia viajen ne'e dok tebtebes",.

Governante ne’e mós husu Superientendente no Diretór Edukasaun Munisípiu Bobonaro atu kordena malu bele harii klase distansia ida husi EBC Balibo atu bele halo sentru ida iha EBF Railuli nune'e bele implementa klase distansia EBC 7ª ano to'o 9ª ano.

"Hakarak ka lakoi ida ne’e tenki estabelese duni tanba haree ba distansia ne'ebé dok ho kondisoens ne'ebé ohin haree no observa direta kondisaun hira bele fó risku ba estudante sira. Ho situasaun sira ne'e la permite ba estudante sira atu bele kontinua sira nia estudu iha Ensinu báziku 7ª to'o 9ª ano", esplika Governante ne’e.

Estudante Primeiru no Segundu Siklu Railuli hamutuk na'in 82, profesór na'in 6.

Hafoin halo vizita ba eskola Báziku Filial Railuli Sua Exelénsia mós ho ekipa halo vizita ba eskola Báziku Filial Weklesse.

#jornalistarita

#MédiaME