𝐃𝐢𝐥𝐢, 𝟏𝟎 𝐌𝐚𝐫𝐬𝐮 𝟐𝟎𝟐𝟔 – Ministru Komérsiu no Indústria, Sr. Nino Pereira, partisipa iha sesaun plenária Parlamentu Nasionál, ba diskusaun no votasaun iha jeneralidade ba Proposta Lei Nú. 20/VI (2.a) kona-ba Lei Promosaun ba Exportasaun.

Importánsia husi Lei Promosaun ba Exportasaun nu’udar inisiativa estratéjika ida ne’ebé importante tebes ba futuru ekonómia nasionál. Lei ida ne’e la’os de’it regula volume exportasaun, maibé mós kontribui atu muda estrutura ekonómia Timor-Leste atu sai ekonómia ne’ebé produtivu no kompetitivu. Durante tinan barak liubá, ekonómia Timor-Leste depende liu ba reseita husi fundu petróleu; tanba ne’e, presiza deversifika ekonómia no kria fonte rendementu foun ne’ebé sustentável.

Exportasaun mak dalan importante ida atu liga merkadu rejionál ho merkadu global, no mós atu hametin kapasidade produsaun nasionál.Ho nune’e, bele promove ita nia produtu orijin Timor-Leste, ka “Made in Timor-Leste”, iha merkadu internasionál. Ida ne’e importante tanba Timor-Leste iha produtu potensial barak, liuliu iha área pescas, agrikultura no produtu transformadu sira hanesan kafé, baunilia, aihoris, no produtu sira seluk ne’ebé bele sai nu’udar komonidade importante ba exportasaun.

Hafoin aprezentasaun relatóriu husi Komisaun D, Proposta lei refere hetan aprovasaun iha faze jeneralidade, ho 𝙫𝙤𝙩𝙪 𝙖𝙛𝙖𝙫𝙤𝙧 54, 𝙠𝙤𝙣𝙩𝙧𝙖 0 𝙣𝙤 𝙖𝙗𝙨𝙩𝙚𝙣𝙨𝙖𝙪𝙣 0.

Proposta Lei Promosaun Exportasaun ida ne’e iha Kapitulu IV (haat) no artigu rua-nulu-resin-tolu (23), ne’ebe define baze enkuadramentu legál ba atividade ekonómia ba esportasaun no re-esportasaun sasán sira iha Timor-Leste.

Lei ne’e regula prosedimentu administrativu hodi haree ba liberdade, garantia no benefisiu ba esportador, kondisaun, obrigasaun husi esportador atu kumpri tuir lei no regulamentu sira iha atividade ekonómia bainhira atu halo esportasaun ka hasai sasan ba rai liur. Lei ne’e mos atu kria ambiente ne'ebé transparente no efisiente ba sistema ida ne’ebé sentraliza esportasaun iha Timor-Leste hodi nune bele fo konfiansa ba esportador.

Diskusaun no votasaun ba iha espesialidade sei realiza iha Munisípiu Liquiçá.

𝙈é𝙙𝙞𝙖 𝙈𝘾𝙄