Liquiçá, – Sekretáriu Estadu Kooperativas (SEKoop), Eng. Arsénio Pereira da Silva, M.Agr., hamutuk ho Administradór Postu Administrativu Loes, Francisco Xavier dos Santos, no Grupu Haburas, hala’o atividade koilleta bafo kayrala iha área hektáres tolu iha Suku Guisu, Postu Administrativu Loes, Munisípiu Liquiçá.

Atividade kolleta ne’e realiza ho objetivu atu hatudu katak bafo kayrala hanesan ai-han lokal ida ne’ebé iha potensia boot atu hasa’e produsaun agríkola no kontribui ba seguransa ai-han iha Timor-Leste.

Iha ninia intervensaun, Sekretáriu Estadu Kooperativas husu ba produtór sira atu produz ho kuantidade boot hodi bele fornese ba demanada merkadu ne’ebé iha. Nia mós fó parabéns ba kamponez no produtór sira tanba produsaun bafo kayrala hatudu rezultadu diak.

“Hau dezafia nafatin ba ita boot sira atu produz ho kuantidade boot, labele hektáre ida ka rua deit, hodi bele fornese ba demanada merkadu hanesan merenda eskolar no mós ba kompania Heineken atu uza ba produsaun serveja iha tinan oin,” hateten SEKoop.

Nia mós enkoraja produtór sira atu kontinua produz produtu agríkola seluk hodi nune’e bele ajuda hasa’e rendimentu família sira, liu-liu iha área rural.

Bafo kayrala la’ós deit uza ba konsumu ema nian, maibé mós bele transforma sai matéria prima industriál atu produz sasoro, paun, biskuit no produtu seluk. Resídu husi produsaun ne’e mós bele uza hanesan han ba animal sira.

Iha tempu hanesan, Administradór Postu Administrativu Loes, Francisco Xavier dos Santos, agradese ba Sekretaria Estadu Kooperativas tanba bele implementa programa agríkola iha área Loes hodi motiva produtór sira atu kuda produtu agríkola ne’ebé iha valor ekonómiku no uza área produtivu sira ne’ebé durante ne’e abandona hela.

Tuir dadus husi funsionáriu sira iha Munisípiu Liquiçá, rai ne’ebé prepara ba atividade agríkola ne’e hamutuk hektáres 37, no Grupu Haburas kuda ona bafo kayrala iha hektáres tolu no sei kontinua tan to’o hektáres 7.

Durante tinan ida ne’e, Sekretáriu Estadu Kooperativas mós halo atividade kolleta bafo kayrala iha munisípiu sira seluk hanesan Aileu, Ermera, Lautém, Bobonaro no Liquiçá, no semana ida ne'e sei hala’o atividade hanesan iha Munisípiu Baucau.

Seremónia kolleta ne’e marka mós ho prezensa Diretór Jerál SEKoop, Eng. Olderico Lopes, Xefe Gabinete Francisca L. de Araújo Simith, autoridade lokal sira, Prezidenti MOKATIL Munisípiu Liquiçá no mós produtór sira iha área refere.

#Média SEKoop#