Asuntu : SEFOPE Despedida Traballadór Timor-oan Na’in 114 molok ba Servisu iha Australia Dili loron 5, fulan-Setembru, tinan 2025, Sekretariu Estadu ba Formasaun Profissionál no Empregu, Sua Exelénsia Rogério Araújo Mendonça L.Ed, partisipa iha serimónia despedida ba traballadór Timor-oan na’in 114 molok ba servisu iha nasaun Australia. Iha diskursu Sekretariu Estadu hateten, serimónia despedida traballadór nia objetivu mak parte governu liuhusi SEFOPE hato’o mensagen ba traballadór sira labele kontra regras no lei Australia nian. “Objetivu prinsipál husi serimónia despedida ida ne’e hodi divulga informasaun ba traballadór sira, nune’e hodi hatene imi nia diretu no dever, ne’e hanesan tradisaun ida atu fó hatene ba traballadór sira hodi labele kontra regras no prosedimentu nasaun Australia nian,” dehan Sekretariu Estadu iha serimónia despedida ne’ebé hala’o iha Palm Spring. Aliende ne’e Sekretariu Estadu akresenta liután katak, Governu sempre apoia traballadór sira liuhusi sira nia negósiu, importante mak ba servisu iha ema nia nasaun fila mai loke negósiu hodi hadia ekonómia familia no nasaun. “Hau enkoraja imi, bainhira ba servisu hetan osan fila mai hadia ekonómia familia, Governu sempre apoia imi liuhusi programa reintegrasaun, apoia imi-nia negosiu ruma hodi emprega maluk Timoroan sira, tanba imi-nia kontribuisaun boot tebes ba familia no Governu,” tenik Sekretariu Estadu. Iha fatin hanesan sekretariu Estadu mós husu ba traballadór ne’ebé foun atu banati tuir traballadór tuan sira, hodi hatudu nafatin komportamentu ne’ebé diak ba empregadór sira, hodi nune’e bainhira fila empregadór bele kontaku nafatin sira. “Ha’u husu ba traballadór foun, atu hatudu imi-nia prestasaun ne’ebé di’ak durante fulan sia, karik imi lahatudu prestasaun ne’ebé di’ak mak bainhira fila mai empregadór sei la bolu tan ona,” nia hatutan. Aleinde ida ne’e reprezenatnte DFAT mos halo intervensaun hato'o mos agradesimentu boot ba traballador sira nia antusiasmu no esforsu hodi hola parte iha programa PALM. Traballador nia partisipasaun fó benefísiu ba emprezáriu sira iha Austrália partikularmente, ajuda emprezariu sira fornese hahán ba povu Austrália no iha parte seluk mos ajuda aselera dezenvolvimentu iha Timór-Leste tamba ne’e nia enkoraja trabalhadór sira atu iha planu negósiu antes de viajen hodi nune depois sira fila mai Timor bele loke negosiu rasik hodi ajuda komunidade lokal sira. Iha serimónia ne’e partisipa mós husi Primeira Sekretaria Embaixadora Australia iha Timor-Leste Sra. Penny Roberts, Diretór Nasionál Empregu Estranjeiru Sr. João Correia no familia traballadór.
Data Publica : 08 Sep 2025
Descrisaun :