Ainaro, 10 marsu 2026 – Sua Exelénsia Ministra Edukasaun Dra. Dulce de Jesus Soares ho Membru Governu Dasia akompaña Sua Exelénsia Primeiru-Ministru Kay Rala Xanana Gusmão hala’o vizita ofisiál ba Eskola Ensinu Báziku Sentrál Fernando Ferraz Ainaro, hodi observa direta ba eskola no programa merenda eskolár ba estudante sira.

Iha vizita ofisiál ne’e, Sua Exelénsia Primeiru-Ministru Kay Rala Xanana Gusmão husu ba profesór sira atu servisu no hanorin estudante sira ho responsabilidade atu nune’e bele prepara estudante sira-nia futuru ho di’ak.

“Profesór sira maka iha responsabilidade boot ba estudante sira, tanba ne’e, servisu ho dedikasaun no sai motivadór ida-ne’ebé di’ak atu nune’e bele prepara estudante sira sai lider ne’ebé di’ak hodi serví rai no nasaun ida-ne’e ba oin” Tenik SE. Primeiru-Ministru

Entretantu, Diretora Eskola Ensinu Báziku 30 Siklu Fernando Ferraz, Sra. Silveira Maria de Araújo hatete, hanesan diretora eskola sente orgullu tebes-tebes tanba durante ne’e Primeiru-Ministru nunka mai iha eskola refere maibé ohin ho prezensa Primeiru-Ministru nian bele lori haksolok mai eskola ida-ne’e.

“ Durante ne’e merenda eskolár la’o la falla no tuir menú ne’ebé maka husi nasionál maibé eskola prepara tuir kondisaun merkadu iha munisípiu Ainaro nian tanba ne’e merenda eskolár la’o ho di’ak tebes no hahán sira ne’ebé oferese ba estudante sira ho produtu lokál exeptu fós, mina, masin mantolun maka sosa iha loja sira maibé restu husi ne’e hanesan modo tahan no seluk tan sosa iha komunidade sira”, dehan Diretora Eskola.

Nune’e iha Eskola Ensinu Báziku Sentrál 30 Siklu Fernando Ferraz iha estudante hamutuk atus tolu, tolunulu-resin-lima (335) kompostu husi mane atus ida, neenulu- resin-sia (169) no feto hamutuk atus ida neenulu-resin-neen (166) nomós profesór iha eskola refere hamutuk ruanulu-resin-haat (24).

#EliasdaCosta

#MédiaME