Manufahi 09/03/2026 Sekretario Estado Peska (SEP) Domingos da Conceição dos Santos “Macaro” Entrega ekipamentu modernu hanesan Trator bo'ot 2 ho roatrio 2 ho atraladu 1, makina koa hare 7, makina kuda hare 11, hand trator 10 no ro fiber glas unidade 6 ba Presidente Autoridade Municipal Manufahi atu bele hasae produsaun iha seitor agrikultura no peska.

Iha entrevista Sekretario Estado Peska Domingo da Conceicao dos Santos Mau-Caro esplika, XI Governo nia komitmentu mak atu hasae produsaun agrikola no Pescas, tanba ne’e mak ita fo apoiu ekipamentu modernu atu bele elemina servisu manual sira hodi transforma servisu manual ba iha moderno.

nia hatutan, durante ita observa katak servisu manual ho forsa rasik produsaun ladun diak, tanba ne’e ita garante katak ho ekipamentu modernu hirak me’ebe mak ita apoiu, bele hasa’e produsaun, maske neneik maibe bebeik atu bele elimina uitoan sasan exportasaun husi rai liur.

Governante ne'e mos husu ba benefisiariu agrikultor sira tenki kuidadu ekipamentu hirak ne'ebe mak MAPPF fo atu bele hasae produsaun agrikola ho kualidade atu bele garante sustentabilidade ba oin.

Nia informa, Munisipio Manufahi iha Postu Administrativo 4, fiar katak ho apoiu ekipamentu hirak ne’e, bele ajuda ona servisu agrikultor sira nian hodi bele hasae produsaun no garante sustentabilidade no kualidade ai-han iha ita nia rai laran.

Iha fatin hanesan Prezidente Autoridade Municipal (PAM) Manufahi 𝐋𝐮𝐢𝐬 𝐌𝐚𝐫𝐜̧𝐚𝐥 𝐝𝐚 𝐂𝐨𝐬𝐭𝐚 𝐓𝐚𝐯𝐚𝐫𝐞𝐬 hato'o agradese ba Ministerio Agrikultura Pekuaria Peska no Floresta (MAPPF) nia apoiu tomak ba iha Munisipiu Manufahi, husi ekipamentu modernu sira ne'e atu bele ajuda n”komunidade agrikultor sira atu bele hasae produsaun agrikola iha setor Agrikultura Pekuaria Peska no Floresta.

Prezidente Autoridade Municipal ne'e mos husu atu halo kontrolu maximu ba ekipamentu hirak ne'e hodi bele utiliza ho responsabilidade, tanba dala barak komunidade agrikultor sira mos la iha kontrolu ba ekipamentu sira nee hanesan oli hodi halo manutensaun rutina atu nune'e bele utiliza ho durasaun tempo ne'ebe mak naruk hodi bele hasae produsaun agrikola iha Munisipiu Manufahi.

Nia akresenta, ba oin Autoridade mos sei halo rekrutamentu ba mekanik atu atu bele destaka iha centru sira hodi halo kontrolu ba iha ekipamentu hirak ne'ebe mak apoiu husi Ministerio Agrikultura Pekuaria Peska no Floresta entrega ba iha Prezidente Autoridade Municipal Manufahi.

Nune'e mos Xefe Peskador Betano Tito Gonzaga hateten, ho ekipamentu modernu hirak ne'ebe MAPPF entrga sira espera katak ba oin bele hasae produsaun agrikola iha setor Agrikultura Pekuaria Peska no Floresta hodi bele sustenta necesidade familia nian, prolema ne'ebe durante hasoru mak menus ekipamentu no peskador ilegal sira ne'ebe tama iha ita nia tasi hodi kaer ikan arbiru.

Tanba ne Peskador refere husu ba parte kompetente atu tau atensaun ba problema ida ne’e. Ekipa DMEA.