Asuntu : 𝐈𝐍𝐃𝐃𝐈𝐂𝐀 𝐄𝐧𝐤𝐨𝐧𝐭𝐫𝐮 𝐡𝐨 𝐕𝐢𝐬𝐞 𝐏𝐫𝐢𝐦𝐞𝐢𝐫𝐮-𝐌𝐢𝐧𝐢𝐬𝐭𝐫𝐮 𝐈𝐈 𝐈𝐧𝐭𝐞𝐫𝐢𝐧𝐮 V DILI, 5 Setembru 2025 – Ohin, ekipa husi Institutu Nasionál ba Defeza Direitu Labarik (INDDICA) halo audiénsia ho Ministru Juventude, Desportu, Arte no Kultura (MJDAK), Nelyo Isaac Sarmento, ne'ebé mós asume knaar nu'udar Vise Primeiru-Ministru II Interinu. Enkontru ne'e hala'o iha Sala Magna, edifísiu MJDAK, iha Lecidere. Objetivu prinsipal husi audiénsia ne'e mak atu fó informasaun badak kona-ba servisu no funsionamentu INDDICA nian. Komisária INDDICA, Dinora Granadeiro, esplika katak, tanba INDDICA iha dependénsia ba Vise Primeiru-Ministru II, importante tebes atu fahe informasaun hirak-ne'e ba Ministru Nelyo Isaac Sarmento. "Ami espera katak, ho informasaun ne'e, Sua Exelénsia bele komprende didi'ak servisu ami-nia nian no iha baze ne'ebé forte atu partisipa iha diskusaun sira iha Konsellu Ministrus, liuliu kona-ba harmonizasaun entre Institutu Públiku (IP) no Empreza Públika (EP) sira. Nune'e, Ministru bele fahe informasaun ho efikásia iha reuniaun sira," tenik Komisária Dinora Granadeiro. Iha enkontru ne'e, partisipa mós Xefe Gabinete husi Ministériu Juventude, Desportu, Arte no Kultura.
Data Publica : 08 Sep 2025
Descrisaun :