Dili, 01 Marsu 2026 – Sekretáriu Estadu Terras no Propriedades (SETP), Jaime Xavier Lopes, M.Eng., partisipa diálogu ida ne’ebé realiza entre Governu, Autoridade Munisipal Dili no komunidade okupante sira iha areadór Eskola Bázika Bemori.

Diálogu ne’e hetan partisipasaun direta hosi Primeiru-Ministru Kay Rala Xanana Gusmão, Ministra Edukasaun, Dra. Dulce de Jesus Soares no Ministru Interior, hamutuk ho lideransa munisipal, Komandante PNTL Munisipiu Dili, no komunidade lokal sira atu buka solusaun konjunta ba situasaun okupasaun iha área eskola nian.

Iha sorumutu ne’e, Sekretáriu Estadu Terras no Propriedades esplika katak tuir dekretu-lei ne'ebé vigora, sasan ka uma sira ne’ebé husik hela husi tempu Indonézia nian automatikamente tama ba responsabilidade Estadu, no administrasaun ba sasan hirak ne’e tuir lei atribui ba Terras no Propriedades. Nia reafirma katak ba komunidade ne'ebé rona ona informasaun kona-ba dispozisaun legal sira ne’e presiza evita mal-entendimentu kona-ba direitu propriedade.

Nia mos husu atensaun ba komunidade katak área ne’ebé destina ona ba funsaun eskola tenke utiliza tuir nia objetivu orijinál, tanba fatin aprendizajen ba labarik sira presiza kondisaun livre no seguru. Nia afirma Tuir informasaun hosi diretores eskola sira, parte área eskola nian seidauk livre tanba okupasaun hosi ema balun, ne’ebé impede prosesu ensinu no aprendizajen.

SETP refere area eskola Bazika Bemori, iha okupante balun hamamuk ona fatin, maibé sei iha balun ne’ebé seidauk hamamuk fatin. Nune'e Governante ne'e afirma governu laiha intensaun atu prejudika diretu sidadaun sira, maibé dezenvolvimentu no edukasaun tenke lao ba oin, liuliu atu garante futuru di’ak ba labarik sira no nasaun.

Tanba ne'e SETP hakarak fo hanoin atu hothotu kontribui hamamuk fatin, tanba Autoridade Munisipal Dili hatete ona sei fó tempu ba okupante sira ne’ebé simu ona notifikasaun atu voluntariamente husik fatin ne’e no buka solusaun alternativa ho maneira pasífika no kolaborativu.

Média SETP