𝐃Í𝐋𝐈-𝐒𝐞𝐠𝐮𝐧𝐝𝐚 𝐥𝐨𝐫𝐨𝐧 𝟐/𝟎𝟑/𝟐𝟎𝟐𝟔,

Ministériu Finansas realiza reuniaun Konsellu Konsultativu Ministériu Finansas (CCMF-sigla portugés), ne’ebé lidera direta husi S.E Ministra Finansas Sra. Santina José Rodrigues F. Viegas Cardoso, no S.E Vise-Ministra Finansas Sra. Regina de Jesus de Sousa.

Objetivu husi reuniaun ne’e hodi atualiza serbisu, avalia dezempeñu, identifika problema no buka solusaun ba diresaun jerál sira hotu nian, nune’e Ministériu Finansas sai nu’udar servidór ida ne’ebé bele presta di’ak liután serbisu sira ho impaktu direta ba povu nia moris.

Reuniaun ne’e mós jerente sira atualiza rezultadu no dezafiu sira ne’ebé enfrenta durante hala’o serbisu iha terrenu, nune’e superior másimu iha instiuisaun nian bele informadu hodi hola desizaun partikularmente liga ho asuntu estratéjiku sira.

Diresau jerál sira iha Ministériu Finansas hanesan Autoridade Aduaneira (AA), Autoridade Tributária (AT), Institutu Nasionál Estatístika Timor-Leste, Institutu Públiku (INETL.IP), Unidade Apoiu Jurídiku (UAJ), Unidade Monitorizasaun no Avaliasaun Dezempeñu (UMAD), Unidade Sentru Kapasitasaun no Jestaun Finansas Públikas (USKJFP), Unidade Sistema Integradu no Informasaun Jestaun Finanseira (USIIJFP), Unidade Inspesaun Jeál (UIJ), Gabinete Polítika no Jestaun Fundu Petrolíferu (GPJFP), Diresaun Jerál Servisu Korporativus (DJSK), Diresaun Jerál Tezouru (DJT), Diresaun Jerál Jestaun no Mobilizasaun no Rekursu Esternu (DJJMRE), Diresaun Jerál Jestaun Patrimoniu Estadu (DJJPE), Diresaun Jerál Planeamentu no Orsamentu (DJPO), Unidade Komunikasaun no Relasaun Públika (UKRP).

Reuniaun ne’e hala’o iha sala auditorium Ministériu Finansas Aitarak-laran. Hetan prezensa másimu husi Komisáriu, prezidente INETL.IP interinu, Diretór Jerál, Diretór Nasionál, Xefe Departamentu, nomós tékniku sira.

#Foto: #Ekipa #Média #Ofisial #Ministériufinansa