𝐃Í𝐋𝐈-𝐊𝐮𝐚𝐫𝐭𝐚 𝟎𝟒/𝟎𝟑/𝟐𝟎𝟐𝟔,

Ministériu Finansas liuhusi Diresaun-Jerál Tezouru (DJT) hamutuk ho Grupu Banku Mundiál hala’o reuniaun ho Empreza Públika sira hodi halo analiza no observasaun kle’an ba relatoriu finanseiru anuál 2024 ne’ebé Empreza Públika sira submete mai Ministériu Finansas no Ministériu relevante sira.

Iha enkontru ne’e, Diresaun-Jerál Tezouru, Ministériu Finansas aprezenta planu formasaun kontabilidade no relatoriu finanseira ho baze akresimu International Financial Reporting Standards (IFRS) ne’ebé Ministériu Finansas planeia atu realiza formasaun espesifiku ba pessoál tékniku sira ne’ebé servisu iha area kontabilidade no relatoriu husi Empreza Públika sira.

Bazeia ba planu IX Governu Konstitusionál, liuhusi Ministériu Finansas iha 2026 sei foku asistensia tékniku ba Empreza Públika iha area kontabilidade no relatoriu finanseira anuál ho baze akresimu IFRS. Foku asistensia iha area kontabilidade no relatoriu ho objetivu atu garantia kualidade, transparánsia, neutru, no sai baze desizaun husi relatoriu finanseira anuál ne’ebé empreza públika sira submete ba Governu iha trimestrál no anuál.

Diretora Nasionál Kontabilidade no Normalizasaun Kontabilistika, Sra. Lidia de Sousa Guterres, hateten objetivu husi enkontru ne’e atu rekolla informasaun nesesariu, no rekomendasaun husi Empreza Públika atu Ministériu Finansas dezeña formasaun ida ne’ebé mais responsidu ba difikuldade ne’ebé durante ne’e empreza sira infrenta iha area kontabilidade no relatoriu finanseira.

Nia dehan, atu uniforma iha meus aprezentasaun relatoriu finanseira anuál husi Empreza Públika, mak hasa’e kualidade relatoriu finanseira anula Empreza Públiku sira nune’e sai baze foti desizaun ba Governu. Iha akompañamentu ka asistensia maximu iha area kontabilidade no relatoriu husi Governu liu husi Ministériu Finansas.

Rezultadu husi enkontru ne’e mak, determina ona kalendariu realiza formasaun kontabilidade no relatoriu finanseira ho baze akrésimu ne’ebé opta ba International Financial Reporting Standards (IFRS). Formasaun ne’e sei realiza iha fulan Julhu-Agostu 2026, iha salaun formasaun Ministériu Finansas.

Ministériu Finansas, toma nota ba nesesidade formasaun area kontabilidade no relatoriu ne’ebé Empreza Publika sira hato’o durante enkontru, nune’e sei traza formasaun ida ne’ebe bele responde ba difikuldade ne’ebé empreza publika sira infrenta iha area servisu kontabilidade no relatoriu nian.

Ministériu Finansas atu uniforma ba aprezentasaun relatoriu finanseira husi Empreza Publika sira liu husi formasaun no prepara formatu no matadalan ba relatoriu finanseira anual ba empreza publika sira.

Ministériu Finansas, informa ba Jestór Finansas nian, tekniku kontabilidade husi empreza publika sira ne’ebe marka prezenca iha enkontru ne’e katak, husi 2026 ba oin Ministériu Finansas sei realiza formasaun kada tinan iha area kontabilidade no relatoriu ho baze akresimu nune bele tulun servisu kontabilidade no relatoriu iha empreza públiku sira.

Reuniaun ne’e hala’o iha Salaun “Lasama” Ministériu Finansas Aitarak-Laran, hetan prezensa masimu husi dirijente no ekipa husi Diresaun-Jerál Tezouru, espesialista kontabilidade Grupu Banku Mundiál Sr. Stephen, nomós Empreza Públika sira hanesan TIMOR GAP, ANATL,E.P, BTL,E.P, EDTL,E.P, RTTL,E.P, no MURAK RAI.

#Foto: #Ekipa #Média #Ofisial #Ministériufinansas