Asuntu : 𝐌𝐈N𝐈𝐒𝐓𝐑𝐔 “𝐎𝐀𝐍 𝐒𝐎𝐑𝐔” ; “𝐕𝐄𝐓𝐄𝐑𝐀𝐍𝐔 𝐒𝐈𝐑𝐀 𝐋𝐀𝐋𝐈𝐊𝐀 𝐋𝐀𝐑𝐀𝐍 𝐓𝐀𝐑𝐈𝐃𝐔, 𝐈𝐌𝐈-𝐍𝐈𝐀𝐍 𝐎𝐒𝐀𝐍 𝐒𝐄𝐍𝐓𝐀𝐕𝐔𝐒 𝐈𝐃𝐀 𝐃𝐄’𝐈𝐓 𝐌𝐎́𝐒 𝐄𝐌𝐀 𝐋𝐀 𝐊𝐎’𝐀” Dili, 04 Setembru 2025 Sua-Exelénsia Ministru bá Asuntu Kombatentes Libertasaun Nasionál (MAKLN), Gil da Costa Monteiro “Oan Soru”, fó hanoin bá nia maluk Veteranus ka Kombatente sira atu lalika laran taridu ka triste ho sira-nian osan $30 ne’ebé ko’a ona kada-fulan, tanba osan sira ne’e atu sentavu-ida de’it mós ema ida la ko’a. Asuntu ne’e Ministru “Oan Soru” hato’o, uainhira halo diskursu iha seremónia lansamentu Ezisténsia no Funsionamentu Banco do Nosso Futuro (BNF), ne’ebé ofisialmente lansa ona hosi Prezidente Repúblika (PR), Ramos-Horta, Primeiru-Ministru (PM), Kay Rala Xanana Gusmão, iha resintu Conselho dos Combatentes da Libertação Nacional (CCLN), Comoro-Dili, Kinta (04/09/2025). Ministru “Oan Soru” relata, Osan Veteranu sira-nian ne’ebé hahú koa iha fulan-Janeiru 2020 to’o fulan-Agostu 2025, hamutuk ona Millaun $55 resin ($55,386.00.000). Osan ida ne’e jere hosi Gabinete Fundo Inevstimento dos Veteranos (G-FIV). Osan na’in mak Veteranus sira, maibé, la’os sira mak atu sai Jestór. Patraun nunka jere nia osan. Jestór mak jere sira-nian osan. “So nune’e de’it mak ita bele kontrola jestór di’ak liu. Bá Veteranus sira hotu, husu ita-boot sira lalika laran taridu. Tanba imi nia osan ne’e sentavus-ida de’it mós sei la lakon saguati, tanba sira ida jere ne’e la’os la eskola hanesan Ministru ida koalia ne’e, lae. Sira matenek. Maibé, ita hotu hamutuk hodi fó biban bá sira, kontrola, fó hanoin, suporta sira, atu nune’e, prosesu bele la’o di’ak iha rai ida ne’e,” hateten Ministru “Oan Soru”, hateten Ministru “Oan Soru”. Eis FALINTIL tinan 24 ne’e dehan, dala-ruma Veteranus koalia hela kona-bá pasájen moruk sira durante luta libertasaun nasionál. Maibé, sira nia idade mesak katuas-ferik hotu ona. Aban bainrua ita kuandu laiha ona, istória ne’e bele lakon, no halibur malu mós karik la konsege ona. Nune’e, Ministru “Oan Soru” dehan, liuhosi dalan kriasaun banku ida ne’e bele halibur Veteranus ninian jerasaun, inklui jerasaun sira hotu ne’ebé pertense bá Timor-Leste. Biar ema dehan Timor rai ida ki’ik no kiak, maibé, hamutuk nafatin hodi hametin unidade no hakat bá oin, atu nune’e, mehi eroi sira nian bele nakfilak sai realidade iha rai ida ne’e. “Prepara hela bee-matan ruma bá ita-nia jerasaun nasaun ne’e ninian, karik bai-loro naruk bee ne’e maran, maibé, udan karik, udan-been di’ak, bee ne’e mós sei sai bee-moris di’ak bá oan sira atu kuru iha futuru, espesiál no en-jerál bá povu tomak,” Governante ne’e fó hanoin. Governante ne’e esplika, razaun seremónia lansamentu ne’e BNF tenke realiza iha iha loron 4 fulan-Setembru, tanba konsidera importante tebes bá TL, iha ne’ebé monu kedas ho loron ida ONU Anunsia rezultadu Konsulta Populár iha loron 04 fulan-Setembru 1999, iha tinan 26 bá kotuk. “Ohin, loron ida ne’ebé orgullu tebtebes, ita hotu sai testamuña, liu-liu estrutura sira frente klandestina nian, atu sai testamuña hela bá fatin ida ne’e, tanba fatin ida ne’e mós uluk nu’udár fatin bá kontájen votu, uluk rezultadu ne’e kontájen balu halo iha ne’e,” relembra Ministru “Oan Soru”. Tanba loron 4 fulan-Setembru nu’udár loron importante no istóriku, nune’e, Eis FALINTIL ne’e husu bá Timor-Oan hotu-hotu atu halo reflesaun bá passadu ne’ebé moruk sira, atu reafirma TL nia prezente hodi prepara aan bá dezenvolvimentu ida iha futuru di’ak liu.
Data Publica : 08 Sep 2025
Descrisaun :