Baucau, 11 Marsu 2026 – Sekretaria Estadu Kooperativas (SEKoop) liu husi Sekretáriu Estadu Kooperativas, Eng. Arsénio Pereira da Silva, M.Agr, fó posse ba Konsellu Diretiva no Konsellu Fiskál Kooperativa Produsaun LOBUSA, iha Kaisidu, Aldeia Parlamentu, Suku Tirilolo, Postu Administrativu Baucau, Munisípiu Baucau.

Seremónia fó posse ne’e realiza hafoin atividade fó posse ba dirijente kooperativa primária tolu iha Salaun Centru Konvensaun Baucau iha parte dader loron hanesan.

Iha ninia intervensaun, Sekretáriu Estadu Kooperativas husu ba membru kooperativa no komunidade atu servisu hamutuk hodi dezenvolve ekonomia iha rai laran liu husi dalan kooperativa. Nia hateten katak Governu kontinua halo politika no programa atu promove dezenvolvimentu ekonomia liu husi movimentu kooperativa.

“Governu nia papel mak kria lei, regula no halo monitorizasaun ba atividade kooperativa sira hodi fó kontribuisaun ba kresimentu ekonomia iha nivel munisípiu,” hateten Sekretáriu Estadu Kooperativas.

Nia mos encoraja Kooperativa Produsaun LOBUSA atu kontinua halo atividade produtivu, liu-liu produtu agríkola sira ne’ebé bele fó benefísiu ba ekonomia família. Governu mos prontu atu ajuda buka merkadu ba produtu sira ne’ebé mak prodús husi membru kooperativa.

Iha parte seluk, Prezidente Kooperativa Produsaun LOBUSA, Maria Goreti L. Rubi, agradese ba Sekretaria Estadu Kooperativas tanba fasilita formasaun bázika kona-ba jestaun kooperativa ba membru sira. Nia mos husu atu SEKoop kontinua halo akompañamentu no ajuda buka merkadu ba produtu sira ne’ebé mak prodús husi grupu ne’e.

Kooperativa LOBUSA rasik harii ona iha tinan hirak liu ba no atualmente hala’o atividade produtiva hanesan kuda bafo kairala, batar, lakeru, pateka, talas no produtu agríkola seluk tan.

Seremónia ne’e marka ho prezensa husi Reprezentante Administradór Postu Administrativu Baucau Vila, Inspetór Gaspar Policarpo Correia husi GIA, reprezentante World Vision Timor-Leste, Prezidente Federasaun Multi-kooperativa Kulugisa, Xefe Suku Tirilolo no konvidadu seluk tan.

#Média_SEKoop2026#