Baucau, 11 Marsu 2026 – Sekretáriu Estadu Kooperativas Timor-Leste (SEKoop) liu husi Sekretáriu Estadu, Arsénio Pereira da Silva, M.Agr., fó pose ba kooperativa primária tolu iha Centro Concentração Baucau (CCB), Munisípiu Baucau. Seremónia ne’e realiza ho objetivu atu formaliza Konsellu Diretiva no konsellu fiskál kooperativa sira atu hala’o knaar tuir lei no regula sira ne’ebé vigora iha país.

Iha nia diskursu, Sekretáriu Estadu hateten katak movimentu kooperativa importante tebes atu hasa’e kresimentu ekonomia iha rai laran. Nia mos fó parabéns ba dirijenti no konsellu fiskál sira ne’ebé simu pose, no enkoraja komunidade sira atu organiza malu hodi participa iha atividade kooperativa.

Nia esplika katak kooperativa sira ne’e mos aliña ho programa IX Governu Konstitusionál Timor-Leste nian, ne’ebé fó prioridade ba dezenvolvimentu ekonomia popular no partisipasaun komunidade iha atividade produtiva. Tuir nia hateten, bainhira parte boot populasaun envolve iha kooperativa, ekonomia iha nivel baze sei sai forte liu.

Sekretáriu Estadu mos agradese ba World Vision Timor-Leste ne’ebé durante ne’e servisu hamutuk ho komunidade sira no apoiu formasaun grupu sira to’o transforma sai kooperativa tuir lei. Nia hateten katak, bainhira grupu sira hetan ona pose no estatutu legal, sei iha sustentabilidade di’ak liu ba futuru.

Iha tempu hanesan, reprezentante husi Autoridade Munisípiu Baucau husu ba dirijenti kooperativa sira atu hala’o knaar ho responsabilidade, transparénsia no serví membru sira ho di’ak. Nune’e mos reprezentante World Vision Timor-Leste iha Baucau hateten katak organizasaun ne’e sente kontente bele servisu hamutuk ho komunidade no parseiru sira, inklui Governu Austrália, hodi fortalece grupu kooperativa sira.

Kooperativa primária tolu ne’ebé maka hetan pose maka: Cooperativa Multisetoral We Matan Foun, Cooperativa Assunção Produção, no Cooperativa Multisetoral Knua Casmutu. Husi kooperativa tolu ne’e, total membru hamutuk 124, kompostu husi mane 77 no feto 47, inklui membru ho difisiénsia balun.

Kapital total husi kooperativa sira ne’e hamutuk US$112,766.73, ne’ebé mai husi poupansa inisial, poupansa obrigatóriu no osan administrasaun.

Tuir dadus Sekretaria Estadu Kooperativas Timor-Leste, atualmente iha rai laran iha kooperativa primária hamutuk 260, federasaun 15, no konfederasaun ida, ho kapital liu US$20 milhaun.

Seremónia pose ne’e mos marka prezensa husi reprezentante Polícia Nacional de Timor-Leste, autoridade lokal sira, líder relijiozu, no membru kooperativa sira.

#Média SEKoop