𝐅𝐢𝐥𝐢𝐩𝐢𝐧𝐚, 𝐌𝐚𝐧𝐢𝐥𝐚; 𝟏𝟐 𝐌𝐚𝐫𝐬𝐮 𝟐𝟎𝟐𝟔

Vise-Ministru Komersiu no Industria, Sr. Augusto Junior Trindade, nu'udar lider SEOM nian ba Timor-Leste, partisipa iha Sorumutuk Ofisial Ekonomiku Senior Preparatoriu (Prep-SEOM) ba Retreat Ministru Ekonomiku ASEAN nian ba dala 32, ne'ebé hala'o iha sidade Bonifacio Global, Manila, Filipina.

Sorumutu ne'e halibur hamutuk lideransa SEOM nian husi Estadu Membru ASEAN sira no Sekretariadu ASEAN nian hodi halo deliberasaun kona-ba asuntu prinsipál sira iha ajenda ekonómika nian iha Komunidade Ekonomika ASEAN nian okos, ne'ebé sei diskute liután no aprova iha Retreat AEM nian ba dala 32 ne'ebé sei hala'o iha loron 13 Marsu 2026.

Diskusaun sira-ne'e kobre perspetiva jeo-ekonomiku rejionál sira, hanesan dezenvolvimentu ekonómiku prioridade Filipina nian, asaun sira ne'ebé akompaña husi Simeira ASEAN ba da-47 foin lalais ne'e inklui integrasaun Timor-Leste nian iha ASEAN nia konkordánsia ekonómika sira, progresu husi Akordu Enkuadramentu Ekonomia dijitál ASEAN nian (DEFA), no mós kooperasaun ASEAN nian ho instituisaun rejionál sira hanesan Institutu Peskiza Ekonomika ASEAN no Azia (ARIA) no Banku Dezenvolvimentu Aziatiku (ADB), no mós envolvimentu ho Parseiru Dialogu ASEAN nian sira.

Durante loron daruak sorumutuk ne'e nian, lideransa SEOM sira mós diskute kona-ba esbosu Deklarasaun Konjunta Ministru Ekonomiku ASEAN nian kona-ba Haforsa Reziliensia Ekonomika ASEAN nian hodi hatán ba dezenvolvimentu ekonómiku no jeopolitiku globál sira ne'ebé foin daudauk ne'e akontese, inklui tensaun sira iha Mediu Oriente. Iha diskusaun ne'e, Timor-Leste subliña importánsia atu rekoñese diversidade iha nivel dezenvolvimentu ekonómiku no reziliensia entre Estadu-membru ASEAN sira, no subliña katak mekanizmu resposta no kooperasaun rejionál sira tenke nafatin responsavel ba nesesidade no sirkunstánsia ekonomia sira ne'ebé dezenvolve no vulneravel liu iha ASEAN laran.

#Media_MCI