Asuntu : 𝐓𝐢𝐦𝐨𝐫-𝐋𝐞𝐬𝐭𝐞 𝐫𝐞𝐚𝐥𝐢𝐳𝐚 𝐞𝐯𝐞𝐧𝐭𝐮 𝐥𝐨𝐫𝐨𝐧 𝐧𝐚𝐬𝐢𝐨𝐧á𝐥 𝐢𝐡𝐚 𝐄𝐱𝐩𝐨 𝟐𝟎𝟐𝟓 𝐎𝐬𝐚𝐤𝐚 𝐎𝐬𝐚𝐤𝐚, 𝟐𝟖 𝐀𝐠𝐨𝐬𝐭𝐮 𝟐𝟎𝟐𝟓 Timor-Leste realiza Eventu Loron Nasioná iha Expo 2025 Osaka, Japaun. Festa ida ne’e sai momentu importante ba nasaun foun, liu-liu iha Sudeste Aziátiku atu hatudu identidade nasionál, kultura no potensia dezenvolvimentu iha palku internasionál. Eventu ne’e nu’udar diplomasia kulturál ida hood hasa’e reputasaun nasaun nian iha komunidade internasional. Prezidente Repúblika José Ramos-Horta partisipa diretamente hanesan invitadu honoráriu iha serimónia ida ne’e no akompaña husi Ministru ba mundo Expo 2025 Yoshitaka Ito, Vise-Primeiru-Ministru no Ministru Koordenadór ba Asuntu Ekonómiku, Ministru Turizmu no Ambiente, Dato’ Seri Francisco Kalbuadi Lay, reprezentante bankada Parlamentu Nasionál, membro governu inklui Komandante Jerál Polisia Nasionál Timor-Leste, Komisario Jerál Polisia Henrique da Costa. Presensa Prezidente Repúblika, José Ramos-Horta hatudu kompromisu Timor-Leste atu hadia liu-tan relasaun diplomátiku ho Japaun, no mós atu estende kooperasaun iha área ekonomia, komérsiu no kultura. Hafoin seremonia loron nasionál remata, Prezidente hamutuk ho Vise-Primeiru- Ministru, reprezentante bankada Parlamentar, no membru governu hala’o vizita ba paviliaun sira hahu husi Timor-Leste nian to’o nasaun sira seluk ne’ebé partisipa iha expo Japaun tinan ne’e. Loron Nasioná iha Expo mak tradisaun ofisiál, ne’ebé kada nasaun partisipante simu loron ida espesiál atu fó hatene kultura, kontribuisaun no partikularidade sira. Iha loron ida ne’e, Timor-Leste hatudu dansa tradisionál, músika no arte-jornál lokál, ne’ebé ilustra riku kultura no patrimóniu nasaun nian. Eventu ida ne’e mós, sai símbolu amizade boot entre Timor-Leste ho Japaun, no mós estratéjia importante atu fó hatene Timor-Leste liu-tan ba mundu tomak. Biban ne’e, Vise-Primeiru-Ministru no Ministru Koordenadór ba Asuntu Ekonómiku, Ministru Turizmu no Ambiente, Dato’ Seri Francisco Kalbuadi Lay oferese han-kalan ida ba Prezidente Repúblika, membru Parlamentu, membru Governo inklui bainaka internasional sira.
Data Publica : 08 Sep 2025
Descrisaun :
