Manatuto, 12 Marsu 2026 – Sekretáriu Estadu Kooperativas (SEKoop), Eng. Arsénio Pereira da Silva, M.Agr., ho nia delegasaun halo vizita servisu ba área produsaun masin iha tasi Balak, Munisípiu Manatuto, atu observa diretamente prosesu produsaun masin tradisionál ne’ebé komunidade lokal sira hala’o.

Vizita ne’e realiza hafoin remata atividade Kuda Bafo Kayrala iha Sentru Viveirus Balak. Iha okaziãun ne’e, Sekretáriu Estadu akompaña husi Diretór Jerál Eng. Olderico Lopes, GIA, Inspektór Gaspar Policarpo Correia, Xefe Gabinete Francisca L. de Araújo Simith, Diretór Nasionál Produsaun Higino Barros, no Diretór Delegasaun Munisipál Manatuto Rui Soares, hamutuk ho funsionáriu sira ne’ebé destaka iha munisípiu refere.

Durante vizita, delegasaun observa diretamente prosesu produsaun masin ne’ebé komunidade sira sei uza ekipamentu tradisionál. Observasaun ne’e importante atu kompriende di’ak liu kondisaun produsaun no posibilidade atu dezenvolve setor ne’e iha futuru.

Dezenvolvimentu produtu masin sai mos hanesan parte husi programa prioridade Governu Konstitusionál IX liu husi Sekretaria Estadu Kooperativas, ho objetivu atu promove produsaun lokál, hasa’e rendimentu komunidade sira, no fó apoiu ba grupu produtor sira iha área kosteira.

SEKoop reafirma nia kompromisu atu kontinua fó apoiu ba komunidade sira liu husi programa dezenvolvimentu kooperativa no atividade produsaun lokál atu kontribui ba kresimentu ekonomia nasionál.

#Média SEKoop#