emase, 12 Marsu 2026 – Sekretáriu Estadu Kooperativas (SEKoop), Eng. Arsénio Pereira da Silva, hamutuk ho Sekretáriu Estadu Terras no Propriedade (SETP), Jaime Xavier Lopes, koilleta Bafo Kayrala iha rai hektares tolu ne’ebé lokaliza iha Postu Administrativu Vemase, Munisípiu Baucau.

Bafo Kayrala ne’e kultiva husi Grupu Babura ho membru hamutuk ema nain 15, kompostu husi feto ema nain lima no mane ema nain sanulu. Iha área refere, grupu ne’e kuda Bafo Kayrala integradu ho produtu agrikultura seluk hanesan batar, bateka, brinjela, aimanas, aifarina, lakeru no produtu seluk tan.

Iha nia intervensaun, Sekretáriu Estadu Kooperativas agradese ba Grupu Babura tanba konsege utiliza apoiu orsamentu ne’ebé mak Governu fó liu husi transferénsia públiku hodi halo produsaun agrikultura. Nia mos enkoraja agrikultór sira atu kontinua produz produtu agrikultura hodi sustenta ekonomia familiar no kontribui ba merkadu lokal.

Nia hateten katak rai produktivu tenki utiliza ho diak atu sai baze rendimentu ba agrikultór sira, liu husi konsumu familia no venda iha merkadu atu hetan osan. SEKoop mos husu ba produtór sira atu kontinua hasa’e produsaun ho kualidade no kuantidade boot, atu bele fornese ba indústria hanesan Kompañia Heineken, ne’ebé bele utiliza Bafo Kayrala nu’udar matéria prima ba produsaun serveja no merenda eskolar.

Bafo Kayrala mos bele halo prosesu panifikasaun hodi produz produtu final oioin hanesan paun, biskuit, sasoro, brownies, cokelate no seluk tan. Residuu husi produsaun ne’e mos bele utiliza nu’udar aihan ba animal sira.

Iha tempu hanesan, Sekretáriu Estadu Terras no Propriedade, Jaime Xavier Lopes, dehan katak rai nu’udar patrimóniu importante ba moris ema, tanba atividade umanu barak realiza iha rai nia leten. Nia husu ba komunidade sira atu utiliza rai abandona hodi halo produsaun agrikultura no mos halo rejistu legal ba rai iha edifísiu Terras no Propriedade atu evita problema iha futuru.

Administradora Postu Administrativu Vemase, Elda M.V.S. Freitas, iha biban ne’e hato’o agradese ba Governu tanba lori programa kooperativa ba komunidade Vemase, no reafirma katak odamatan administrasaun postu nafatin nakloke atu simu programa dezenvolvimentu sira husi Governu.

Seremónia koilleta ne’e mos inklui distribuisaun produtu final husi Bafo Kayrala hanesan biskuit ba komunidade no labarik sira ne’ebé marka prezensa.

Tuir dadus Sekretaria Estadu Kooperativas nian, iha Munisípiu Baucau iha kooperativa primária hamutuk 23 ho atividade oioin hanesan produsaun agrikultura, hakiak animal, kréditu uniaun no multi-sektoral. Iha Postu Administrativu Vemase rasik iha kooperativa primária lima no grupu produsaun ida maka Grupu Babura.

Programa prioridades Sekkretaria Estadu Kooperativas nian ba tinan lima hamutuk 6, hanesan, Bafo Kayrala, produsaun Bani ben, mina kami, mina nu'u no karau susuben, maibe ba agora dadaun programa tolu maka lao ona maka hanesan produsaun Bafo Kayrala, Bani Ben no Masin, produsaun Bafo Kayrala iha teritóriu laran tomak hamutuk hektares 189 ne'ebé kultiva ona, iha Munisípiu Baucau rasik kultiva hamutuk 12 hektares maibe moris diak hamutuk 8 hektares deit iha postu administrativu sira ne'ebé maka pertense ba Munisípiu Baucau nian.

Marka prezensa iha seremónia Koilleta Bafo Kayrala ne'e maka hanesan, Komandante Eskuadra PNTL Postu Administrativu Vemase, Diretór Geral Eng. Olderico Lopes, Xefe Gabinete Francisca L. de Araújo Simith, GIA. Inspektor Gaspar Policarpo Correia Kargu diresaun no xefia sira, Reprezentante liña ministeriál sira ne'ebé maka iha Munisípiu Baucau no Komunidade sira iha área refere.

#Média SEKoop#