𝐋𝐢𝐤𝐢𝐬á, 𝟏𝟑 𝐌𝐚𝐫𝐬𝐮 𝟐𝟎𝟐𝟔 - Loron ikus ba diskusaun no votasaun iha nivel espesialidade ba Proposta Lei Nú. 20/VI (2.a) kona-ba Lei Promosaun ba Exportasaun, ne’ebe realiza durante loron tolu, hahú husi loron 11 to’o 13 fulan Marsu 2026, iha Salaun IADE, Munisípiu Likisá.

Deputadu sira husi Komisaun D Parlamentu Nasionál no Governu ne’ebé reprezenta husi Ministru Komérsiu no Indústria, Sr. Nino Pereira, hamutuk ho liña ministeriál sira seluk hanesan Ministériu Finansas, ne’ebé reprezenta husi Komísariu Aduaneiru (Alfândega), Ministériu Koordenadór ba Asuntu Ekonómiku (MCAE) no TradeInvest, konklui ona diskusaun no votasaun iha espesialidade ba artigu 1 to’o artigu 23 husi Proposta Lei refere.

Diskusaun no votasaun iha espesialidade ne’e realiza iha âmbitu prosesu lejislativu Parlamentu Nasionál nian, atu aprofunda no finaliza dispozisaun sira iha proposta lei ne’e, antes tama ba votasaun final global.

Entertanto, durante diskusaun kona-ba artigu 22 ne’ebé refere ba revogasaun, parte Governu esklarese katak la konkorda atu elimina proposta ida ne’e. Iha hanoin ida, parte Governu konsidera katak presiza hamosu fali artigu foun hodi substitui artigu ne’e.

Pozisaun Governu la konkorda atu elimina artigu ne’e, tanba artigu ne’e importante hodi asegura klaridade no seguransa juridiku iha implementasaun Lei Promosaun ba Exportasaun, Governu husu hodi haree mós korensia artigu ne’e, no iha hanoin ida atu propoen hamosu fali artigu foun hodi troka artigu 22.

Ikus tama ba votasaun ba iha proposta numeru 11 ho votu afavor 8, kontra 1 no abstensaun 1, proposta numeru 14 hamosu artigu foun, pasa ho votus afavor 10, kontra 0 abstensaun 0, nune’e proposta eliminasaun ka alterasaun ba iha artigu 22 no hamosu artigu foun ho votus unamidade, Komisaun D Parlamentu Nasional fó tempu fulan 6 ba Governu hodi prepara testu final ba artigu foun, ne’ebé inklui:

Regulamentu, dekretu lei, no dokumentu juridiku ne’ebé aplikável, hodi garante implementasaun klaru no seguransa juridiku husi lei. Hafoin testu final sei aprezenta hikas ba Komisaun D hodi haree mós, no hala’o rekomendasaun final antes aprovasaun iha plenáriu.

Partisipa iha diskusaun ne’e, Prezidente Komisaun D ho Membru sira, Ministru Komérsiu no Indústria, Koordenador Juridiku, Ministériu Koordenador Asuntos Ekonomia, ALFANDEGA, Tradeinvest, tekniku no Asesor sira.

#MediaMCI