Lospalos, 16 Marsu 2026 – Sekretáriu Estadu Kooperativas (SEKoop), Eng. Arsénio Pereira da Silva, M.Agr., partisipa iha seremónia inaugurasaun Balkaun Úniku (BU) iha Munisípiu Lautém, Segunda-feira (16/03). Inaugurasaun ne’e lidera husi Primeiru-Ministru Kay Rala Xanana Gusmão, ho akompañamentu husi Ministru Administrasaun Estatál (MAE), Tomás do Rosário Cabral.

Iha oportunidade ne’e, autoridáde sira mós halo entrega kartaun Billete Identidade (BI) la limitadu ba Ema ho Difisiénsia (EHD), Francisco de Jesus Ximenes, no entrega Sertidaun Rejistu Kriminál ba benefisiária Marcelina Dias.

Edifísiu Balkaun Úniku ne’e konstrui ho orsamentu Governu atu fasilita atendimentu públiku iha munisípiu. Ho inaugurasaun ne’e, munisípiu sira ne’ebé seidauk iha Balkaun Úniku mak Ainaro no Viqueque de’it.

Ministru Administrasaun Estatál, Tomás do Rosário Cabral, hateten katak Governu sei kontinua hadi’a servisu Balkaun Úniku iha munisípiu sira. Nia mós informa katak Balkaun Úniku iha Munisípiu Ermera sei halo inaugurasaun iha tempu badak.

“Preokupasaun ita boot sira maka pasaporte. Maibé iha Balkaun Úniku munisípiu halo de’it rejistu, no prosesu imprime sentraliza iha Ministériu Justisa. Problema seluk ne’ebé BU sira enfrenta maka notariadu tanba notáriu sira iha munisípiu susar atu kontrola,” hateten Tomás Cabral.

Prezidente Autoridade Munisípiu Lautém, Mélio de Jesus, agradese ba Governu tanba orsamentu ba programa ne’e aprova iha Komisaun Revizaun Orsamentu (KRO) 2024, ne’ebé permite konstrui edifísiu hodi fó atendimentu ba populasaun.

Iha Balkaun Úniku ne’e, populasaun bele trata dokumentu ofisiál sira hanesan pasaporte, Billete Identidade, Sertidaun Rejistu Kriminál no dokumentu ofisiál seluk. Iha oportunidade ne’e mós entrega motorizada ida no karreta ida hodi fasilita funsionáriu sira iha atendimentu ba komunidade.

Seremónia inaugurasaun ne’e partisipa husi membru Governu, membru Parlamentu Nasionál, inklui Tenente Jenerál reformadu Lere Anan Timur, Majór Jenerál João Miranda "Aluc Descartes" no Majór Jenerál Cornélio Ximenes "Maunana", hamutuk ho intelektuál sira husi Lautém.

#Média SEKoop#