𝟏𝟒 𝐌𝐚𝐫𝐬𝐮 𝟐𝟎𝟐𝟔

===========

Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, konvoka reuniaun ho Vise-Ministra ASEAN, Milena Maria da Costa Rangel, no mós lideransa husi instituisaun tutelada sira atu diskute preparativu ba Diálogu Polítika Nível A’as Timor-Leste (TL) iha ASEAN.

Reuniaun ne’ebé hala'o iha Gabinete Vise-PM, Farol, Díli, Sábadu, 14 Marsu 2026 ne'e fó atensaun ba preparasaun eventu diálogu polítika nível a’as ne’ebé sei realiza iha Palm Spring Hotel, Díli, iha loron 26 no 27 Marsu 2026. Eventu ne’e nia objetivu mak atu promove kompriensaun komún iha Governu tomak kona-ba oinsá adezaun Timor-Leste ba ASEAN bele utiliza ho estratéjiku atu avansa prioridade dezenvolvimentu nasionál.