𝟏𝟔 𝐌𝐚𝐫𝐬𝐮 𝟐𝟎𝟐𝟔

===========

Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente (VPM-MKAE-MTA) hala’o enkontru ho Embaixadora Austrália iha Timor-Leste, Caitlin Wilson, hodi ko’alia asuntu estratéjiku balu ne’ebé importante ba relasaun bilaterál no dezenvolvimentu ekonómiku Timor-Leste nian.

Enkontru ne’e hala’o iha Gabinete Vise-PM, Farol, Díli, Segunda, 16 Marsu 2026, iha ne’ebé parte rua ko’alia liu-liu kona-bá asuntu importante tolu mak hanesan: Primeiru, kona-bá atualizasaun preparasaun ba Timor-Leste–Australia Economic Forum 2026, ne’ebé planeadu atu realiza iha fulan Setembru 2026. Iha okaziaun ne’e, ekipa tékniku sira fó atualizasaun ba Vise-PM kona-bá preparasaun nota de konseitu ba fórum refere. Data ofisiál ba eventu ne’e sei deside iha enkontru ekipa tékniku tuir mai.

Diskusaun sira mós ko’alia progresu preparasaun téknika ba fórum, inklui organizasaun Gala Dinner no mekanizmu atu fasilita enkontru entre kompañia sira husi Timor-Leste no Austrália. Inisiativa ida ne’e sei kria oportunidade atu estabelese parseria negósiu entre parte rua, liuhusi asina Memorandu Entendimentu (MoU) ka akordu komersiál seluk entre entidade emprezariál sira durante realizasaun fórum.

Segundu, diskute situasaun atuál iha rejiaun, liu-liu relasiona ho konflitu ne’ebé oras ne’e akontese entre Israel, Estadu Unidus Amérika no Iraun. Diskusaun sira foka liu-liu ba potensia impaktu ba Timor-Leste, liu-liu iha área seguransa kombustível no enerjia. Iha kontestu ne’e, parte Austrália reafirma sira-nia prontidaun atu fó apoiu ba Timor-Leste atu asegura estabilidade no seguransa fornesimentu enerjia, karik Timor-Leste presiza.

Terseiru, diskusaun mós oinsa haree oportunidade ba dezenvolvimentu turizmu iha Timor-Leste, liu-liu turizmu aventura ka tracking tourism. Inisiativa ida ne’e foka ba dezenvolve rota turístika sira iha fatin istóriku sira ne’ebé relasiona ho dalan sira ne’ebé uza husi funu-na’in sira durante Segunda Guerra Mundial no mós períodu INTERFET, ne’ebé bele sai potensia importante atu atrai turista internasionál no promove patrimóniu istóriku Timor-Leste nian.

Governu Timor-Leste kontinua hametin kooperasaun ho Austrália hodi promove kreximentu ekonómiku, seguransa enerjia, dezenvolvimentu sustentável no seluk tan.