Asuntu : 𝐌𝐉𝐃𝐀𝐊, 𝐂𝐃𝐓𝐋 , 𝐂𝐎𝐍𝐓𝐋 𝐑𝐞𝐮𝐧𝐢𝐚𝐮𝐧 𝐀𝐭𝐮 𝐅𝐢𝐧𝐚𝐥𝐢𝐳𝐚 𝐏𝐫𝐞𝐩𝐚𝐫𝐚𝐬𝐚𝐮𝐧 𝐀𝐭𝐥𝐞𝐭𝐚 𝐒𝐢𝐫𝐚 𝐁𝐚 𝐒𝐄𝐀 𝐆𝐀𝐌𝐄𝐒 𝟐𝟎𝟐𝟓 Dili, 08 Setembru 2025 - Ministériu Juventude, Desportu, Arte no Kultura (MJDAK), liuhosi Diresaun Jerál Desportu (DJD) halo reuniaun ho Konfederasaun Desportiva Timor-Leste (CDTL) no Komité Olimpiku Nasionál Timor-Leste (CONTL) hodi halo preparasaun ba atleta sira ne’ebé sei partisipa iha kompetisaun SEA Games iha Tailandia, iha fulan-Dezembru 2025. Reuniaun ne’e lidera hosi Diretór Jerál Desportu (DJD), João Rodrigues, no akompaña husi Diretór Nasionál Desportu Federadu (DNDF), Oscar Quintas. Iha enkontru ne’e, Diretór Jerál Rodrigues hateten katak MJDAK deside ona hodi apoia modalidade lima ne’ebé mak sei kompete iha SEA Games, mak hanesan Atletizmu, Taekwondo, Karate-Do, Boxe, no Futebol. Prezidente CDTL, Macario Sanches, deskreve enkontru ida-ne’e nu’udar pasu ida ne’ebé pozitivu tebes. Nia hateten, diskusaun entre Komité Olimpiku, Federasaun sira, no Governu liuhosi MJDAK nia rezultadu iha ona desizaun importante rua. Desizaun dahuluk mak define númeru modalidade ne’ebé Governu apoia. Desizaun daruak mak aumenta númeru atleta ba modalidade ida-idak, atu nune’e sira bele hahú kedas sira-nia preparasaun: Atletizmu:aumenta husi na’in lima (5) ba na’in hitu (7), Boxe: aumenta husi kategoria hitu (7) ba kategoria sanulu (10), Taekwondo: aumenta husi na’in hitu (7) ba na’in sia (9), Karate: nafatin ho na’in hitu (7), Futebol: nafatin ho na’in 20 atleta, inklui ofisiál na'in lima (5). Total kontinjente ne’ebé sei reprezenta Timor-Leste iha kompetisaun ne’e hamutuk na’in 73. Macario Sanches hatutan katak númeru ne’ebé fiksa ona ne’e la iha tan selesaun, katak atleta sira ne’ebé define ona sei tama kedas ba faze preparasaun, tanba tempu ba preparasaun agora menus ona husi loron 90. Sanches mós husu ba atleta sira atu la’ós de’it ba partisipa, maibé tenke kompete ho kualidade aas atu nune’e bele hatudu katak atleta Timor-Leste maturu no preparadu duni ba jogu. Nia realsa katak Federasaun Internasionál balun finansia direta modalidade balun, no CDTL la iha problema ho ida-ne’e tanba ne’e fó oportunidade ba federasaun sira ne’ebé la tama iha lista Governu nian. Iha fatin hanesan, Xefe Misaun CONTL ba SEA Games, Vicente de Carvalho, ne’ebé mós Prezidente ba modalidade Body Building, espresa katak sira preokupadu ho númeru ne’ebé seidauk definitivu, maibé nia sente optimista tanba iha ona enkontru ida ne’e hodi finaliza númeru ne’e hodi bele informa ba Komisaun SEA Games iha Tailandia.
Data Publica : 09 Sep 2025
Descrisaun :