Dili, 17 Marsu 2026

Primeiru-Ministru Kayrala Xanana Gusmão hala’o vizita ofisiál bá munisípiu Lautem Segunda ohin, iha vizita ne’e akompaña mós husi Ministru Transportes no Komunikasaun, Eng.Miguel Marques Gonçalves Manetelu no membru governu balu.

Xefe Governu husu bá Autoridade munisípiu Lautem hahú husi PAM, APA, xefe suku sira no intelektuál lautem oan sira atu tur hamutuk hodi diskuti povu lautem nia futuru.

“Imi nia servisu laos atu manan osan imi nia servisu atu tau matan bá lautem no povu lautem ne’e duni koordenasaun importante tebes ko’alia bá malu lalika dehan ha’u mak matenek ha’u mak iha ne’ebá, imi ajuda malu, servisu nu’udar ekipa, imi buka reuni ko’alia bá malu kona-bá difikuldade saida deit maka munisípiu hasoru, hodi nune’e prepara aan atu bele sai governu lokál iha munisípiu lautem. Tanba ne’e asembleia munisipál sei buka tuir imi halo saida tanba ne’e ita iha estadu tun mai kraik, imi mak halo imi mak tenke hatudu bá povu ida ne’e, lalika hatudu bá ema seluk katak imi hadomi rai ida ne’e imi hadomi povu ida ne’e ne’ebé administradór postu sira, xefe suku sira ko’alia bá malu” PM Xanana husu.

Iha sorin seluk Xefe suku Bauro, Florindo Miranda preokupa tebes ho liña internet iha nia suku no husu Ministériu Transportes no Komunikasaun atu hadia liña internet iha sira nia suku.

“Há’u nia rekomendasaun bá ministériu transportes no komunikasaun atu haree bá liña internet iha ami nia munisípiu lautem tanba iha area remotas ami atu asesu liña internet susar lahalimar” dehan Xefe suku Bauro Florindo Miranda.

Hatan bá preokupasaun husi Xefe suku Bauro Florindo Miranda, Ministru Manetelu hateten problema liña internet laos de’it iha suku Bauro maibé iha teritoriu nasionál hasoru problema hirak ne’e maibé governu sei buka meiu hodi rezolve iha tinan ne’e.

“Ohin kona-bá internet ha’u hanoin laos de’it suku Bauro kuaze area remotas sira iha situasaun ne’ebé hanesan maibé atu informa katak ho problema ida internet maka governu deside halo investimentu bá kabu submarinu fibra otika, atu informa katak projetu ne’e konklui agóra ita halo teste hela internet sira ne’ebé mak uja hela iha servisu publiku tantu nasionál mai to’o munisípiu internet ne’ebé ohin ita uja ne’e mai husi kabu submarinu, ita espera katak antes fulan ida ne’e remata ou tarde liu primeira semana fulan abril ita bele lansa ready for service” Ministru Manetelu responde’’.

Primeiru-Ministru Kay Rala Xanana Gusmão afirma desentralizasaun poder lokál laos atu ukun maibe atu servi, ne'e duni husu bá intelektuál oan sira husi munisípiu lautem atu kontinua dezenvolve potensiál sira iha munisípiu hodi nune'e bá futuru lautem oan sira rasik mak sei sai nain bá dezenvolvimentu.

https://sdi.gov.tl/ministerio/presrealease/create 

𝐌𝐞́𝐝𝐢𝐚 𝐌𝐓𝐊