𝟏𝟕 𝐌𝐚𝐫𝐬𝐮 𝟐𝟎𝟐𝟔

============

Vise-Primeiru-Ministru no Ministru Koordenadór ba Assuntu Ekonómia, Ministru Turizmu no Ambiente, Dato’ Seri Francisco Kalbuadi Lay hala’o enkontru ho Koordenadóra Rezidente ONU iha Timor-Leste, Olufunmilayo (Funmi) Abosede Balogun-Alexander hodi diskute kona-ba diálogu entre governu no ONU.

Vise-Primeiru-Ministru no Ministru Koordenadór ba Assuntu Ekonómia, Ministru Turizmu no Ambiente, Dato’ Seri Francisco Kalbuadi Lay hateten, enkontru ne’e atu hametin liu-tan liña koordenasaun serbisu entre governu atual ho ONU iha Timor-Leste.

𝐆𝐚𝐛𝐢𝐧𝐞𝐭𝐞 𝐊𝐨𝐨𝐫𝐝𝐞𝐧𝐚𝐝ó𝐫𝐚 𝐑𝐞𝐳𝐢𝐝𝐞𝐧𝐭𝐞 𝐎𝐍𝐔 𝐧𝐢𝐚𝐧

Sistema ONU nian iha Timor-Leste kompostu hosi ajénsia oioin liu 21. Iha Koordenadóra Rezidente nia lideransa, ajénsia ONU hotu-hotu mai hamutuk ho povu, Governu Timor-Leste, no parseiru dezenvolvimentu sira hodi fó apoiu ba realizasaun prioridade dezenvolvimentu nasionál Timor-Leste nian.

Gabinete Koordenadór Rezidente ONU nian (UNRCO) apoia no koordena serbisu hosi entidade sira ONU nian hodi hadi'a impaktu, efisiénsia, no efikásia hosi atividade operasionál sira ONU nian ba dezenvolvimentu sustentável iha nivel nasaun nian.

Koordenadóra Rezidente ONU nian mak Sekretáriu Jerál ONU nia reprezentante ne'ebé dezignadu iha nasaun ne'e no sai hanesan pontu kontaktu ba asuntu hotu-hotu ne'ebé relasiona ho serbisu sistema Nasoins Unidas nian iha nasaun ne'e.

UNRCO fó apoiu koordenasaun inter-ajénsia ba Ekipa País ONU (UNCT) no ninia sub-grupu oioin (Ekipa Jestaun Operasaun – OMT, Grupu Komunikasaun ONU – UNCG no Grupu Tarefa Jéneru ONU - GTG). Apoiu ne’e inklui planeamentu estratéjiku, koordenasaun programa, jestaun operasaun, orientasaun polítika, jestaun dadus, komunikasaun, informasaun públiku, no relatóriu rezultadu – hotu-hotu buka atu hasa’e koerénsia ONU nian no hadi’a impaktu jerál programa nian hodi alkansa di’ak liután rezultadu dezenvolvimentu nian.

Olufunmilayo (Funmi) Abosede Balogun-Alexander hanesan Koordenadóra Rezidente ONU nian iha Timor-Leste. Nia iha esperiénsia dezenvolvimentu internasionál no umanitária liu tinan 30, inklui lidera polítika no programa sira no esperiénsia ho governu sira, ONU, ONG internasionál sira no iha konsellu organizasaun sira la'ós lukrativu nian hodi hamosu impaktu no rezultadu sira.

𝐅𝐮𝐧𝐬𝐢𝐨𝐧𝐚𝐫𝐢𝐮 𝐎𝐍𝐔 𝐧𝐢𝐚𝐧 𝐢𝐡𝐚 𝐓𝐢𝐦𝐨𝐫-𝐋𝐞𝐬𝐭𝐞

Iha pesoál Nasoins Unidas nian liu 500 iha Timor-Leste, ne’ebé serbisu hamutuk ho ajénsia ONU rezidente no naun-rezidente hamutuk 21 resin ne’ebé kontribui ba asegura moris di’ak ba povu Timor-Leste. Ba detallu liután kona-ba serbisu no ajénsia sira ONU nian iha Timor-Leste, haree Entidade sira ONU nian iha Timor-Leste.

ONU fó konsellu no apoiu bazeia ba ninia esperiénsia globál, rejionál, nasionál, no lokál.

ONU iha Timor-Leste fó valór no dudu husi prinsípiu direitus umanus, dezenvolvimentu ne’ebé di’ak, no nesesidade umanitária.