Asuntu : Ministra MSSI Apoiu Kadeira no Banku ba Estudante iha Centro Social Imaculada Conceição Lautem Ministra Solidariedade Sosiál no Inkluzaun, Verónica das Dores, apoiu kadeira 30 no banku 30 ba Centro Social Imaculada Conceição (CSIC), ne’ebé lokaliza iha aldeia Iparira, suku Parlamento, postu administrativu Lautem, munisípiu Lautem. Apoiu ne’e fó ho intensaun atu fasilita aprendizajen ba estudante sira ne’ebé hela iha Centro refere, no mós fó oportunidade ba estudante seluk atu hakle’an sira nia koñesimentu iha lian Português, komputador no atividades seluk iha tempu livre. "Ha’u kontente loos fó apoiu ba labarik sira iha Centro ne'e, liu-liu ba madre sira nia karizmu hodi hanorin labarik sira, tanba sira mak jerasaun ba futuru nasaun nian" katak Ministra. Iha biban hanesan Responsável Centro, Irmã Rosa de Jesus Soares, agradese tanba Ministra ho laran luak bele apoiu ona fasilidade eskola nian iha Centro ne'e hodi fasilita aprendizajen ba ki'ikoan sira. Totál, estudante sira ne’ebé frekuenta prosesu aprendizajen iha CSIC no inklui eskola seluk, hamutuk estudante 114. Sira envolve iha programa Atividades Tempos Livres (ATL), ne’ebé Irmã sira fasilita hodi reviu no aprofunda buat ne'ebé sira aprende iha eskola, inklui: • Lia-português • Lia-tetun • Komputador • No atividades edukativu seluk. Centro Social Imaculada Conceição rekoñesidu hanesan Estatutu Utilidade Sosiál husi Ministériu Solidariedade Sosiál no Inkluzaun ho baze formalizadu husi Despacho n.º 153/2021, de 23 de julho de 2021. Aleinde apoiu kadeira no banku, MSSI mós apoiu fós.
Data Publica : 09 Sep 2025
Descrisaun :